Assi: KNR

Kim Kielsenimut tatiginnikkunnaarnissaq amerlanerussuteqaqqarluinnartut itigartikkaat

Illua tungiliuttut nipisattassiineq pillugu suliaq nalunaaquttap akunnerini arfiniliugallartuni oqallisigineqareersorlu Kim Kielsenimut tatiginninnatik nalunaarput.

Inuit Ataqatigiit, Atassut, Suleqatigiissitsisut aamma Partii Naleraq naalakkersuisut siulittaasuannut Kim Kielsenimut tatiginnikkunnaarlutik nalunaaqutaq qulingiluanngorluinnartoq nalunaarput. 

Tamanna Inatsissartut nipisattasiissutit pillugit suliamik nalunaaquttap akunnerini arfiniliugallartuni oqallisereersullu.

Ataatsimiinneq nalunaaqutaq 21.35 nanginneqarpoq, Aleqa Hammondilu (NQ) Kim Kielsenimut tatiginnilluni nalunaarpoq, tatiginikkunaarnermillu taasinissamut pinngitsortitsiniarluni oqaluuserisassani ingerlaqqinnissamik siunnersuuteqarluni. 

- Siumut, Demokraatit Nunatta Qitornaasalu inatsisartunut Massakkut qinissamut piffissaanngitsutut isigivaat. Taassuma tunngavilersuutaasa ilaat taama imaqarpoq. 

Taanna minutsit sisamat qaangiummata taasissutigineqarpoq: 14-it akuersisut, 13-it naaggaarput, marlullu taasinngitsoorlutik. 

Taamaalillunilu Kim Kielsenimut tatiginnikkunnarnissaq amerlanerussuteqaqqarluinnarluni itigartinneqarpoq.  

Marloriarlugu misissugaasoq

Pineqartoq tassaavoq, Naalakkersuisut siulittaasuat, Kim Kielsen (Siumut), nipisattassiissutinik amerlileeqataagami suliamut attuumavallaarsimanersoq, tassami taamaalinerani umiatsiani aalisartumut attartugassanngortissimavaa. 

Suliaq taanna marloriarlugu suliarineqarpoq. Siullermik eqqartuussissuserisoqarfimmit Poul Schmith, Naalakkersuisunit suliakkinneqartumit. Taava aamma kukkunersiunermut ataatsimiititaliaq suliamut nalunaarusiorpoq, septembarip arfineq aappaanni tunniunneqartumik. Taannalu isorinnippoq. 

AAMMA ATUARUK Nipisattassiissutinut suliap isornartorsiorneqarneranut oqallinneq sakkortooq: Unikkallartariaqarpugut

Ataatsimiititaliaq ”sakkortuumik uparuaallunilu” suliap ilai ”isornartortutut” taavai. Ataatsimiititaliarli oqaaseqartarnermini isornartorsiuinerpaamik oqaaseqarsinnaanerminik tassa ”sakkortuumik uparuaanermik” oqaaseqarpoq.

Kukkunersiuinermut ataatsimiititaliap oqaaseqarsinnaaneranik tamanna sakkortunerpaamik isornartorsiuineruvoq.

Taamalu isornartorsiuineq illua tungiliuttut tamarmiusut kissaateqarmata ullumi nalunaaqutaq pingasumiilli oqallisigineqarpoq. Suliaq Kim Kielsenimut kinguneqassanersoq, illuatungiliuttut oqallisigiumavaat.

Nalunaaquttallu akunnerini arfinilinni oqallisereernermi illuatungiliuttut tatiginnikkunaarluni taasinissamik qulingiluanngorluinnartoq tunniussipput.

Allagaatit tunniunenqassasut

Oqallittut attortisimaaqaat, suleqatiginninnerlunnermik isertornermillu pasiliinerit imaaginnavipput, oqaluttarfimmiillu ussersortoqaqaaq. 

Ataatsimilli nikeriartoqarpoq. Tassalu allagaatit kukkunersiuinermut ataatsimiititaliap, nipisattassiissutinut tunngasumik suliaq misissoramikku Naalakkersuisunit pissarsiarinngisani, tigussavai.

Pappialat taakkorpiaat pingaaruteqarnerannut peqqutaasoq paasilluarniagassaalaarpoq: Tassami isornartuusutut kukkunersiuinermut ataatsimiititaliap tikkuagaasa ilaat tassaavoq, allagaatit Naalakkersuisunit piumasatik tigusimanngimmatigit. 

Ataatsimiititaliap allagaatit, naalakkersuisoqarfimmi sulinermi atukkat, taavalu eqqartuussissuserisoqarfimmik Poul Schmithimik allaqatigiittarermit pappialaatit pisarsiarisimanngilai. Allagaatit taakkua marluk allagaatinik takunnissinnaatitaanermut ilaanngitsut, Naalakkersuisut siulittaasuata Naalakkersuisoqarfiata ilisimatitsissutiginikuuaa.

Pappialani taakkunani suna allassimanersoq, Inasisartunut ilaasortat ilisimanngilaat. Taamaammat Naalakkersuisut paasissutissanik isertuussinerarlugit pissuutinneqaqattaarput.

Paasissutissammi taakkua tamanut takusassanngortinneqartariaqartut, illuatungiliuttut tamarmik oqaatigaat.

- Sunaana taama isertuussassaatigimmat, pappialat taakkua tunniukkumangikkisi? Arlaannik ajortoqarluinnarsimavoq, Partii Naleqqap siulittaasua Hans Enoksen oqarpoq.

Erik Jensen (S) Kukkunersiuinermut ataatsimiititaliami siulittaasuuvoq. Taanna Hans Enoksenimit kaammattorneqarluni oqaaseqarpoq:

-  Paasissutissat, suliap uuma suliariniarnerani pisariaqartut, tamaasa pissarsiarisinnaanagit kipiluttunarpoq, taanna oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat