Kim Kielsen uummatimigut suliaritissasoq
Kim Kielsen uummalluppoq. Taamaammat Rigshospitalimi qanittumi suliaritissaaq.
- Uani piffik kingulleq napparsimasaqattaarnikuuvunga, taava oqarsinnaavunga uummatinnik aamma uneqattaarlunga, taava soorunami imminut paarinerulaartariaqarsimavunga, aamma massakkut paasivara ippassaanikkunni tassa Rigshospitalimut uummatinnik suliaritikkiartussallunga, Kim Kielsen KNR-imut oqarpoq.
Taamaammat sapaatini akunnerni arlalinni suliffimminiinngikkallassaaq.
- Immaqa ullut 14-it, septembarip qeqqata tungaanut taanna naatsorsuutigineqassaaq, tassa nakorsaminngaanniit eqqissisimaaqqusaagama, taava soorunami taanna kiisami naalalaartariaqarpara, Kielsen oqarpoq.
Inunnguutsiminik uummalluuteqartoq
Kim Kielsen inunnguutsiminik uummalluttuuvoq, taamaammat tamanna Kielsenip suliffimminit pissuteqannginnerarpaa.
- Imaanngilaq suliannut tunngatillugu taamaattoqartoq kisianni sananeqaatinnik akornuteqarsimagami, uummatinni suliarineqarsinnaasumik, Naalakkersuisut siulittaasuat oqarpoq.
AAMMA ATUARUK Kielsen ullut 16-it nipangersimareerluni isornartorsiuisunut akissuteqartoq
Kim Kielsenip uummatimigut ajoquteqarluni ukiut marluk matuma siorna Folketingip ammarneqarnerani uppinnermini paasivaa. Tassani ambulancenik Rigshospitaliliaanneqarpoq, uppinnerminilu silaqaannavilluni.
- Tassa siornaakkunnili taamaalisimavunga. Folketingimi taamani ammaanersiornermi taamaaqqaarsimavunga, taava upernaaq manna pingajussaa tassa pingasoriarlunga unippunga, Kim Kielsen oqarpoq.
Maqaasineqarnini paasisinnaagaa
Kielsen politikkikkut suliaqarnerminit tunuavinnissaminik eqqarsaateqanngilaq. Sulininili napparsimasut siniffianit nakkutiginiarsariniarlugu – taamaakkaluartorli Naalakkersuisut siulittaasuata naalakkersuisoqarfiani allaffia septembarip affaani siullermi inoqassanngilaq.
Kielsen piffissami kingullermi politikikkut assoruuteqarpoq, isornartorsiuisullu najuuppallaannginneranik isornartorsiupput.
- Soorunami tupinnanngilaq maqaasissagaannga, uani piffik kingulleq tassa napparsimasaqattaarnikuuvunga.
