Kim Kielsen: Tamat oqartussaaqataanerat unioqqutinneqarpoq
Naalakkersuisunut ilaasortap Kim Kielsenip, taasissussisarsimanerit pillugit oqallinnermik aallarniisut ilaata, attattuarsinnarpaa taasissussisarsimanerit inatsisinik unioqqutitsinerusut. Politimesterilli aalajangernera ataqqigaluarlugu ima oqarpoq:
- Inatsisartut inatsisaat unioqqutinneqarsimavoq. §31, immikkoortoq 2-mi ima ersaritsigisumik allassimasoqarmat: "Ilaasortat inatsisartut taasinernut taamaallaat peqataasinnaapput nammineerlutik najuukkunik." Taamaammat aallaqqaataaniilli oqaatigivara tamanna tamat oqartussaaqataanerannik unioqqutitsinerusoq, aamma ulloq manna tikillugu taama isumaqarpunga, Kim Kielsen oqarpoq.
Taasissussisarsimanerit pillugit suliaq ingerlalertormat Inatsisartut siulittaasuat Ruth Heilmann oqarpoq malittarisassat sukaterneqassasut, sukaterneqarpullumi. Tamanna naammappa?
- Sukaterisoqarsimappat tamanna ajunngilaq, taamaattorli eqqaamasariaqarpoq pisimasoq tamat oqartussaaqataanerannik innarliimmat, Inatsisartunullu tatiginninneq aamma innarlerneqarluni, naalakkersuisunut ilaasortaq Radioaviisimut oqarpoq.