Kim Kielsen: Tamat oqartussaaqataanerannut saassussineruvoq
Kim Kielsenip Helle Thorning-Schmidt ippassaq oqaloqatigereerlugu taama oqarpoq. Tamanna pissaaq, naak Nunatta saassunneqarnissaa Kim Kielsenip ilimaginngikkaluaraa.
Københavnimi pisut Kim Kielsenip ima oqaaseqarfigai:
- Ingasattajaarniat taamaaliornerat tujorminaqaaq, tusarlugu taamatut peqqarniisaarniat aallaasersorsimasut inuit akornanni tulluanngilaq, Kim Kielsen taama oqarpoq. Pinerlunnerlu ima oqatigaa:
- Tassa tamat oqartussaaqataanerannut saassussineruvoq.
Pisimasullu Naalagaaffeqatigiit immikkoortuini pingasuni siuttunit oqaloqatigiissutigineqassapput.
- Ippassaq pisut eqqarsaatigalugit statsministeri oqaloqatigivara, taava takorloorparput aamma arlaannik iliuuseqassalluta oqaloqatigiissutigeerutsigu, arlaannik immaqa sukaterisoqalaassooq nakkutilliinermut tunngatillugu.
Savalimmiut lagmandiat aamma oqaloqatigiinnermi peqataassasoq, Kim Kielsenip oqaatigaa.
Nunarput peqqarniisaarnianit saassunneqarnissaa Naalakkersuisut siulittaasuata ilimaginngikkaluarpaa:
- Qanoq annertutigisumik maani Nunatsinni taamatut pisoqariasaarnissaa taanna takorlooruminaalaarpoq.
Taamaattorli assersuutigalugu peqqarniisaarnianik Kangerlussuakkoortoqarsinnaanera aamma takorloorneqarsinnaasoq, Kim Kielsenip eqqaavaa.
Aammali nunarsuarmioqataanitsigut saassunneqaratarsinnaasunik Nunatsinni peqartoq tikkuarpaa:
- Pituffik aamma maaniippoq, taava allat qallunaat naalagaaffiata sinniisoqarfiilu maaniillutik, periarfissat assigiinngitsut peqqarniisaarnianit orniginartinneqarsinnaasarput, Naalakkersuisut siulittaasuat KNR-imut taama oqarpoq.
