Kim Kielsen nunatsinni uuliamik gassimillu nittarsaassiartorluni USA-miittoq
Naalakkersuisut siulittaasuat, Kim Kielsen, nunatsinni uuliasiornissamik pisinnaatitsissuteqarfinnik nutaanik nittarsaassiartorluni Texasimi Houstonimiippoq.
Uuliasiornermut gassisiornermullu periusissiaq nutaaq Naalakkersuisut qanittukkut akueraat.
Uuliasiornissamut gassisiornissamullu misissuinissamut soqutiginnilersitseqqinnissaq periusissiami pingaarnertut aallunneqarpoq.
Kim Kielsenip nunarput pillugu uuliasiornermut ingerlatseqatigiiffinnut immikkut saqqummiineq ammarpaa. Tassani geologii, uuliaqassuseq pillugu misissuinerit, inatsisit piumasaqaatillu sammineqartut, Naalakkersuisut tusagassiuutinut nalunaarummi allapput.
Nunatta ilaatigut erngup nukinganik nukissiorfiliornikkut nunat tamalaat silap pissusaa pillugu anguniagaannut, tassani gassimik silaannarmik kissatsikkiartortitsisumik CO2-mik aniatitsinnginnerunissaq ilaalluni, tapersersoraa, Kim Kielsen oqarpoq.
- Peqatigisaanillu oqaatigisariaqarparput uuliap piumaneqarnerata ukiuni tulliuttuni annertusiartornissaa naatsorsuutigineqartoq. Nunarsuarmi nukissiuutit amerlasuut uulianit gassinillu atuitillugit Kalaallit Nunaat allatulli uulianik gassinillu piiaasinnaavoq avammullu tuniniaasinnaalluni, Kim Kielsen tusagassiuutinut nalunaarummi oqaaseqaateqarpoq.
Nunani tamalaani piumasaqaatit qaffasinnersaat naapertorlugit uuliasiortoqassasoq ilanngullugu oqaatigaa.
Kim Kielsen Namminersorlutik Oqartussaniillu atorfilittat Londonimut aaqqissuussamut assingusumut februaarip ulluisa qulingani aallartittussamut aamma peqataajartussapput.
