Kim Kielsen naalakkersuisunut ilaasortanngorpoq
Siumut sinnerlugu inatsisartuni ilaasortaq Politiitut ilinniarsimasoq Kim Kielsen Ineqarnermut, Attaveqaqatigiinnermut Aatsitassanullu Naalakkersuisussatut Inatsisartunit ullumi akuerineqarpoq.
Kim Kielsen aperaarput Naalakkersuisunut ilaasortanngornini qanoq igineraa.
- Naalakkersuisutut ivertinneqarnera assut nuannaarutigivara, partiit tamarmik tapersiinerat aamma assut nuannerpoq, Kim Kielsen oqarpoq.
Taanna aamma oqarpoq naalakkersuisutut sulinermini pingaarnertut angallannermut tunngasut anguniarumallugit.
- Massakkut angallannermut tunngasut oqallisaaqaat taakkuuppullu anguniagassatut qiviarniakkakka. Taamatuttaaq sanaartornermut tunngatillugu malinnaarusoqaanga soorunalumi aamma attaveqaatinut tunngatillugu nuna tamakkerlugu qiviassagaanni nunaqarfiit immaqa 95 procentii attaveqaatinut atassuteqarput, Kim Kielsen oqarpoq.
Ilutigitillugu qalleqqissaavoq savaatillit attaveqarfilerneqarnissaasa ujartuiffigineqarsinnaanerannut peqataarusullutik.
Kim Kielsen aperaarput naalakkersuisunngornini piareersimaffigilluarneraa.
- Ukiorli nalunaarfigineqarama piareersarpunga suut pitsaaqutigissanerai ajoqutigissaneraalu eqqarsaatigilluarsimaqaara, ilaquttanut aamma qanoq sunniuteqassanersoq. Tamakku tunngavigalugit aalajangiivunga taamaattumillu aalajangiinera ataqqillugu suliniuteqassaanga piviusunngortissallugulu, taama oqarpoq ullumimiit Ineqarnermut, Attaveqarnermut Aatsitassanullu Naalakkersuisunngortoq Kim Kielsen.
