Kim Kielsen: Lars-Emili kalaalinngorsaanermi tamaviaarsimammat toqqarparput
Air Greenlandip ukiumoortumik Katuami ataatsimeersuarnerani 56,7 millioni koruuninik sinneqartoorsimaneq nersualaarneqaraluaqisoq, siulersuini siulittaasoq Julia Pars taarserlugu Lars-Emil Johansen siulersuisuniilissaaq.
Angallannermut naalakkersuisoq Kim Kielsen taarsiinertik pillugu ilaatigut oqarpoq Namminersulernissaq qanillilluinnarmat siulersuisuniititatik taarserarneqalersut.
- Lars-Emili tassunga inissinneqarpoq Namminersornerup tungaatigut ikaarsaariarnermi kalaalinngorsaanermi tamaviaartutut oqariartuutinik pimoorussilluartutut aamma naapitsitsisinnaasututut isigigatsigu, Kim Kielsen aallartippoq.
Lars-Emil Johansen inatsisartunut qinigassanngorteqqinniarani nalunaareerpoq. Kammalaatitut Air Greenlandip siulersuisuinut ilanngutsippisiuk? aperaarput.
- Naamik. Oqariartuutigut assigiinngitsuupput. Naalakkersuisuni aamma namminersornermut ikaarsaariarnermi piginneqatigiiffinnut assigiinngitsunut, selskabinut, nutaamik inissitsiterisalerpugut, toqqakkatta aallussilluarnissaat siunnerfigalugit, Kim Kielsen oqarpoq.
Siumumi naligiissitaanerunissaq eqqartorneqartarpoq. Matumanili Air Greenlandip siulersuini arnartatuaasoq Julia Pars peersinneqarpoq. Arnaanera pissutaanerluni? apereqqipparput.
- Imaanngilaq arnaanera angutaaneraluunniit apeqqutaatikkipput. Uani piginnaasai najoqqutaralugit toqqaavvugut, Kim Kielsen erseqqissaavoq.
Julia Pars aperaarput tunuartussanngornini qanoq isumaqarfigineraa.
- Soorunami uannut uggornalaarpoq aamma misigisimavunga nukissaqarluarlunga piumassuseqarluarlungalu siulersuisuni ingerlaqqinnissamut, taamaakkaluartoq piginnittoq taamaatut aalajangiisimammat akueriinnartariaqassavara, Julia Pars oqarpoq.
Lars-Emil Johansen imminit misilittagaqarnerusorinngilaa, tassami nammineq inuusuttuugaluarluni arnaallnilu ukiorpaalunni siulersuisuni ilaasortaasareerpoq.
- Air Greenlandip siulersuisuini ajunngitsumik angusaqarluarsimallunga isumaqarpunga, aamma misilittagaqareerpunga. MBA-mik (nunarsuarmi niueqatigiinnerup iluani ilinniaqqinneq, aaqq.) atuarnikuuvunga naammassilluarlugulu. Aamma inuusuttuuvunga arnaallunga. Misisisgimavunga aamma maani nunatsinni atorfissaqassallunga siunissami, Julia Pars, Air Greenlandimi siulersuisuni siulittaasutut ullumi tunuartoq kingulliullugu tusaavarsi.
Air Greenlandip pisortaa Michael Binzer, siulittaasup tunuartinneqarneranut ugguarpoq, annerusumilli piginnittut toqqagaat Lars-Emil Johansen oqaaseqarfigisinnaannginnerarlugu.
Tusagassiortunik katersortitsinerup kingorna siulersuisunngortut ataatsimiinnerminni siulersuisussaminnik toqqaanngillat. Ataatsimiinnertik unnugu nangikkunikku inissitsiterumaarlutik ilimagaat.
Air Greenland arfineq-pingasunik siulersuisuni ilaasortaqarpoq.
Namminersornerullutik Oqartussat piginneqataassutaannik 37,5 procentinut sinniisutut marluk naalakkersuisunit toqqagaasarput. Alla ataaseq SAS-imit aamma 37,5 procentimik piginneqataassuteqartunit toqqagaasarpoq.
Marluk Danmarkip Naalagaaffianit 25 procentinik piginneqataassuteqartumit toqqagaasarput, kiisalu Air Grrenlandip sulisuisa akornanni pingasunik siulersuisuni ilaasortassarsiortoqartarpoq.
Ullumi ataatsimeersuarnermi siulersuisuni ilaasortat arfinillit peqataapput danskit aallartitaat ataaseq najuutinngitsoq, soorluttaaq Lars-Emil Johansen najuutinngitsoq.
