Kim Kielsen kuultiusumik Nersornaaserneqarpoq

Inatsisartut Siulittaasuata Naalakkersuisut Siulittaasuat Kim Kielsen kuultiusumik Nersornaaserpaa ukiorpassuarni naalakkersuinikkut suliaqarsimaneranik Naalakkersuisunullu Siulittaasuuneranik nersorinnissutitut.

- 2005-imiit Inatsisartunut ilaasortaaninni assigiinngitsorpassuarnik atuuffeqarsimavutit, aatsitassanut avatangiisinullu tunngasut aamma inuussutissarsiortunut atugassarititaasut immikkut annerusumik sammisimallugit. Ingasattajaarnanga aamma oqaatigissavara ukioq 2014 naalakkersuinermik suliaqarnerit eqqarsaatigalugu ilinnut immikkorluinnaq issimammat, tassami ukioq taanna partiimut siulittaasunngorlutillu Naalakkersuisunut siulittaasunngorputit.
Naalakkersuinikkut sulinerit najukkani ataasiakkaani inuiaqatigiit atugaannik sukumiisumik ilisimasaqarnermik aallaaveqarpoq, naalakkersuinikkullu isiginneriaatsit najukkani pissutsinik, minnerunngitsumik innuttaasut ulluinnarni atugaannik, toqqammaveqarluni. Naalakkersuinikkut sulisimanippit annertuumik tunniussimallutillu sulisimanerit takutippaa, tamannalu Siulittaasoqarfiup nersorniarpaa matumani kuultiusumik Nersornaaserneqarnikkut, Inatsisartut Siulittaasuata Lars-Emil Johansenip Kim Kielsenimut oqaaseqarnermini ilaatigut oqarpoq.

49-nik ukiulik Kim Kielsen  2007-imiit 2009-mut Attaveqaqatigiinnermut Avatangiisinullu Naalakkersuisuuvoq, 2013-imiillu 2014-imut Avatangiisinut, Pinngortitamut Nunallu Avannarliit Suleqatigiinnerannut Naalakkersuisuulluni. 2014-imi Siumut siulittaasuattut qinigaavoq, Naalakkersuisunullu siulittaasunngorluni.