Assi: KNR / Malik Brøns

Kim Kielsen KNI pillugu kusanaatsuliamut akuliukkumanngikkallarpoq

Naalakkersuisut siulittaasuat Kim Kielsen (S) KNI-p quersuarmiittuutaanik kukkusumik naalilersuisoqarsimaneranik kusanaatsuliamut maanna misissuiffigineqartumut oqaaseqarnianngikkallarpoq. KNR-imut taama paasissutsisiivoq.

Namminersorlutik Oqartussat ingerlatseqatigiiffiutaani KNI-mi aalassassimaartoqarpoq, suliffeqarfimmi ataqqisaasumi pissutsit arlaqartut aalassassimaarutaammata. 

KNI-p quersuaaniitut ukiuni qulini nalitunaarneqartarsimapput, suliffimmilu aqutsisut tamanna nassueritigaat. 

Suliffeqarfissuup quersuaani imaannaanngitsunik ukiut marluk sioqqullugu ajornartorsiuteqalereertoq KNR-imi oqaluttuaraarput.

KNI-mi aqutsisut aamma piginneqatigiiffilerinermi inatsisilerinermut lektorimit Troels Michael Liljamit Copenhagen Business Schoolimeersumit imaannaanngitsumik isornartorsiorneqarput.

AAMMA ATUARUK Ekspert udtaler alvorlig kritik af ledelsen i KNI

KNI-mi quersuarmiittutit pillugit kusanaatsuliaq - suliaq naatsumik
  • KNI quersuarmiittuutiminnik nalunaarsuinermini naatsorsuinerminilu 2010-miilli kukkujuartarsimavoq.
  • Tassa imaappoq: 2010-miit ukiuni pingasuni quersuaarmiittutit naleqassusaat 70 millionit koruuninik amerlavallaagaapput, ukiunilu kingullerni arfineq marlunni 50 millionit koruuninik amerlavallaagaalutik.
  • Kukkuneq KNI-p naatsorsueriaasianut nalunaarsuineranit allaaveqarpoq, kikkulli kukkuluttorsimanersut KNI-p oqaatigisinnaanngilaa.
  • Tamanna suliffeqarfiup nammineq pigisaata 50 millionit koruuninik ukiup qiteqqunnerani decembarimi naatsorsuusiornermi ikilineqarnerannik kinguneqassaaq.
  • Kukkuneq suliffeqarfiup aningaasaqarneranut, tamatumani ingerlatsinermi angusaanut, KNI-meersut oqarnerat naapertorlugit sunniuteqangaarnavianngilaq.

Naalakkersuisut siulittaasuat suliffeqarfissuullu piginnittuisa, tassa Namminersorlutik Oqartussat, sinniisuat, pineqartoq pilugu oqaaseqarumananilu qisuariarnianngillaq.

- Saaffiginnissutissinnut qujanaq. Pisoq pillugu Naalakkersuisut siulittaasuat malinnaaqqissaarpoq, kisianni arlaannaannulluunniit attuumassuteqanngitsunit misissuisoqarnerani oqaaseqarusunngilaq, Kim Kielsenip allattaa Angutinnguaq Tittussen, mailikkut KNR-mut nassitsilluni taama paasissutissiivoq.

Allat misissuilertut

Kusanaatsuliaq sapaatit akunneranni kingullermi saqqummiunneqarmat, KNI-mi siulersuisut siulittaasuata Lars Borris Pedersenip nalunaarutigaa, pineqartoq pillugu kukkunersiuisuit avataaneersut Deloitte-ip misissuiffigigaat.

Quersuarmiittuutit nalitunaarneqarsimanerannut ataatillugu pinerluttuliortoqarsimasinnaaneranik qularnissamut pisutissaqanngitsutut, siulittaasup suliffeqarfimmilu aqutsisut isumaqarput.

AAMMA ATUARUK KNI-mi millioninik kukkusoqarnera: Quersuarmiittuutit kukkusumik nalilerneri angusanut sunniuteqartoq

Kisianni Deloittep KNI-iilluunniit illuap iluani kukkunersiuisuisa kukkuneq ilungersunartoq naammattuunngitsoorpaat, taamaammallu pisimasup allamit misissorneqannginissaaanik aalajangerneq isornartorsiorneqarpoq. KNI-mili aqutsisut isumaat ullualuit matuma siorna mumilluinnarpoq.

AAMMA ATUARUK Quersuarmiittuutit naatsorsorneri kukkuneqarujussuartut: KNI-p siulittaasuata qullersat pisuunnginnerarai

- Toqqortigassaqanngilagut, taamaattumik isertugaqarata ammasumik perusuppugut, siulittaasoq KNR-imut allakkatigut allappoq nangillunilu:

- Aallartipallannissaa tamaviaarutigaarput, piffissamilu qaninnerpaami aallartinnissaa naatsorsuutigaarput. Misissuineq qaqagu naammassissanersoq oqaatigisinnaanngilarput, kisianni sukkanerpaamik aallartissaaq, Lars Borris Pedersen KNR-imut allappoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat