Kim Kielsen kinaana?
Inatsisartuni ilaasortaq Kim Kielsen ippassaq radio aviisimi tusarliunneqarpoq naalakkersuisuni ilaasortat tamarmik isumaqataaffigisaannik Jørgen Wæver Johansenip naalakkersuisuuffigisimasaanut tassalu Ineqarnermut, Attaveqarnermut, Aatsitassanut Ikummatissanullu naalakkersuisunngortinneqarnissaa piukkukkitsik.
Erseqqissaatigissavarpulli tamanna inatsisartunit aalajangerneqaqqaartussaammat.
Kim Kielseniliuna kinarpiaasoq?
Kim Kielsen 1966-mi Paamiuni inunngorpoq. Inuusuttuaraallunili umiarsuarni sinersortaatini tassalu Diskomi Kunuunnguamilu ukiuni qulini sinersorpoq.
1993-imi politiitut sulilerpoq 2003-imi suliunnaarallarnissami tungaanut. Politiitullu suliffigisimavai Upernaviup kommunia kiisalu Paamiut.
Kim Kielsen nuliaqarpoq marlunnillu 14-inik 20-inillu ukiulinnik qitornaqarlutik.
Kim Kielsen 2005-imi Paamiuni kommunalbestyrelsemut qinigaavoq, maannalu siullertut Paamiuni viceborgmesteriulluni.
Kim Kielsen Siumut tunuliaqutaralugu 2005-mi Inatsisartunut qinigaavoq, Inatsisartullu tunuliaqutaralugit ataatsimiititaliat assigiinngitsut ilaasortaaffigai.
Nuummi politeeqarfiup ittuata Bent Heiselbergip Kimmip angutaata suleqatigineratigut Kim Kielsen meeraasorli ilisarisimalersimavaa.
- Kimmip tassunga naalakkersuisoqarfimmut inissinneqarnissaa innersuussutigilluarsinnaavara, Bent Heiselberg oqarpoq.
Nangilluni oqaluttuarpoq Kim Kielsen ukiorpassuarni sinerissami umiartortuarsimagami sinerissami ikkarlunnguanut allaat tamaasa ilisimalluarai, taamatuttaaq angalajumatoqigami piniarnermik soqutigisaqarluartuusoq. Pikkunaatsortaalu ima eqqaavaa:
- Pikkunaariarsinnaavorli tassami pujortanngisaannarlunilu iminngisaannarami allaammi kaffisornerluunnit ajorpoq aamma tiitorneq ajorpoq. Imersinnaasaa ingasannerpaassappat taamaallaat colatortarpoq, Bent Heiselberg oqarpoq.
