Kim Kielsen: Kalaallit Nunaat immikkut isumaqatigiissuteqassaaq
Attaveqarnermut Avatangiisinullu naalakkersuisoq Kim Kielsen danskillu silap pissusaa pillugu ministeriat, Connie Hedegaard, Polenimi ataatsimeersuarneq iluatsillugu qanittukkut naapipput.
- Ataatsimiinnitsinni Kalaallit Nunaata immikkut isumaqatigiissuteqarnissaanik piumasaqarpoq, tamannami nunatta ineriartornissaanut pinngitsoorneqarsinnaanngilaq, Kim Kielsen oqarpoq.
Immikkut isumaqatigiissuteqarnissamut piumasaqaat Connie Hedegaardip qanoq isumaqarfigaa?
- Kalaallit Nunaat immikkuullarissumik isumaqatigiissuteqarniarluni kissaateqartoq, Connie Hedegaardip aasarli nalunngilaa, aamma piumasaqaat iluarinngilaa. Massakkut taamatut oqariartuuteqaqqinnerput aamma iluarivallaanngilaa, kisianni oqaloqatigiinnerput ingerlaavartussaavoq.
Polenimi ataatsimeeqatigiinnermi ilaatigut nunat inoqqaavisa kissaataat tusaaniarneqanngitsutut oqallisigineqarput, sooruna tusaaniarneqanngitsutut misigisimasusi?
- Tusaaniarneqannginnerat ersarissupilussuuvoq, isumaqatigiissutiniluunniit ilanngunneqanngillat, tamannalu Connie Hedegaardimut apuuppara kaammattorlugulu nunat inoqqaavisa oqariartuutaat tusaaniassagai, taanna aamma soqutigilluinnarpaa.
Kim Kielsenip ilanngullugu oqaatigaa, nunatsinni nukissiuutinik ataavartunik ineriartortitsineq, soorlu erngup nukinganik nukissiuutinik sanaartorneq siunissami ingerlaannassasoq. Siunertaanerarlugu siunissami innaallagissamik atuinerup 80 procentia erngup nukinganit pissarsiarineqartalissasoq.
