Kim Kielsen: Isorliunerusut aningaasartuuteqarnerunerat Nuummit matussuserneqassapput
Innaallagissamut imermullu akit paasiuminarnerulernissaat, aningaasartuutillu akinut naleqqussarneqarnissaat siunertaralugu, assigiimmik akeqartitsinerup atorunnaarsinneqarnissaa akileraartarnermik aaqqissuusseqqinnermut peqatigitillugu akuerineqarpoq.
Paasiuminarnerulersitsisoqarsimanngilaq
Assigiimmik akeqartitsinerup atorunnaarsinneqarnerani aningaasartuutiviusut annertunerusumik ilisimaneqalersimasut, kisiannili suli tamakkiisumik paasiuminarnerulersitsisoqarsimanngitsoq naliliinermi inerniliissutaasut pingaarnersaraat.
Aaqqissuusseqqinnerup malitsigisaanik innuttaasut amerlanerit siornatigumut naleqqiullugu aningaasanik amerlanerusunik atorsinnaasaqalersimasut Kim Kielsenip ilanngullugu erseqqissarpaa.
- Kisiannili innuttaasunit 10 procentingajaat innaallagisamut imermullu akit qaffasinnerpaaffissaannik, 3,68 koruuninik aamma 31,97 koruuninik akiliisarput. Innuttaasut taakku isorliunerusuni najugaqartuupput, Kim Kielsen oqarpoq.
Suliffeqarfiit aalisarnermik ingerlatsisut naliliinermi ilanngunneqarput.
Suliffeqarfiit aalisarnermi ingerlatsisut najukkami tunisassiornermut aningaasartuutimi pingajorarterutaannaat akilertarpaat.
Taamatut akikillisaaffigineqarnerat 2008-mi 102 mio. koruuninik sipaagaqarnerinik kinguneqartussaavoq. Taamaattumik aqqissuussineq taama ittoq inuiaqatigiit aningasaqarnerat eqqarsaatigalugu naleqqunnersoq oqallisigineqartariaqarpoq, Kim Kielsen oqarpoq.
Taamaalilluni sumiiffinni arlaqartuni suliffeqarfiit aalisarnermik ingerlatsisut innaallagissamut akiliutigisartagaat, Nukissiorfiit uuliamik atuinermut aningaasartuutigisaanit annikinnerusarput.
Inatsisartut ullumi oqallinnerat tunngavigalugu akit aaqqissuunneqarnissaannik 2010-miit atuutilersissamik Naalakkersuisut siunnersuusiussapput.
