Kim Kielsenip sulinngiffeqarniarluni pilersaaruteqarneranut tusatsiakkat KNR-imit sapaatip akunnerini arlaqalersuni inuttaanit uppernarsartinniaraluarpagut.

Kim Kielsen Inatsisartunit sulinngiffeqarusuppoq

Inatsisartut ukiaanerani ataatsimiinnissaat aallarnerlugu sianeq kasunneqarpat, Siumup siulittaasorisimasaata Kim Kielsenip Inatsisartuni ilaasortat akornanni takussaassannginnissaa ilimanarluinnarpoq.

Inatsisartunut ukioq manna apriilimi qinersisoqarmat Siumukkormiuni qinerneqarnerpaaq, Kim Kielsen, Inatsisartunit sulinngiffeqarniarluni qinnuteqarpoq.

Tamanna KNR-ip tusarfiisa arlallit imminnut attuumassuteqanngitsut uppernarsarpaat.

Kim Kielsenip sulinngiffeqarniarluni pilersaaruteqarneranut tusatsiakkat KNR-imit sapaatip akunnerini arlaqalersuni inuttaanit uppernarsartinniaraluarpagut. Tamannali ulloq manna tikillugu iluatsissimanngilaq.

Inatsisartut siulittaasoqarfiata Kielsenip sulinngiffeqarniarnera aamma uppernarsarusunngilaa.

Siumup Inatsisartuni sinniisussaatitaatut inissisimasut siullersaat, Karl-Frederik Danielsen, Kim Kielsenimut sinniisussatut Inatsisartut ukiaanerani ataatsimiinneranni aggersarneqarsimavoq.

Tamanna inuttaata nammineq KNR-imut uppernarsarpaa.

- Kisianni Kangaatsiamut nooqqammerama ilinniartitsisunngoqqammerlungalu itigartinniarpakka, oqarpoq.

Sinniisussani inissisimasut tulliat Nikkulaat Jerimiasseniuvoq. Taannali suli attavigineqarsimanani KNR-imut oqarpoq.

Inatsisartut ukiaanerani ataatsimiinnerat tallimanngorpat tulliani septembarip 24-ani aallartissaaq.

Saqqumilaanngilaq

Kim Kielsen Inatsisartunut ukioq manna apriilimili qinersisoqarmat saqqumilaanngilaq. Inatsisartunut qinersisoqarmalli Naalakkersuisunut apeqquteqaranilu Inatsisartut ukiaanerani ataatsimiinnissaanut siunnersuuteqanngilaq.

Siumup siulittaasorisimasaa kingullermik ukioq manna juunip 25-ani tuttaqarpoq, taamani allaaserisani qulequtserneqarsimasoq 'Qaqortumi mittarfik SANANEQASSAAQ' Siumup nittartagaatigut saqqummersippaa.

Kim Kielsenip Siumumi pissaaneq siorna novembarimi annaavaa, taamani siulittaasussarsiorluni qinersinerup inernerinik 39 - 32-nik taasisoqarnerani Erik Jensenimit uppisinneqarami.

Qaammatialuilli qaangiunnerani Inatsisartunut qinersisoqarmat Kim Kielsen qinerneqarluarpoq.

Kielsenimmi Erik Jensen taaguunneqarnermigut qinersisunik 655-inik qaangerpaa, taamaalilluni inuttut 1.841-inik qinerneqarluni partiimini taaguunneqarnerpaajuvoq, Erik Jensen inuttut 1.186-inik qinerneqartoq.

Kim Kielsen, aamma aalisartuullunilu piniartuusoq, Imarsiornermik Ilinniarfimmi kystskipperitut ullumikkut aamma ilinniartuuvoq.

Politiitut ilinniagaqalinngikkallarami aamma politikkimut isiginngikkallarami imarsiortutut inuussutissarsiuteqareernikuuvoq.

Kim Kielsen politikkimut 2005-imi Inatsisartunut qinigaangami iseqqaarpooq.

Tamatuma kingorna qinersisoqarnerani qinigaaqqittarpoq. Naalakkersuisunut 2014-imi siulittaasunngornissani sioqqullugu aamma arlaleriarluni naalakkersuisunut ilaasortaasarsimavoq.

Inatsisartut Kim Kielsenip sulinngiffeqarniarluni qinnuteqaataanik akuersisuusussaaput. Tamannalu pissaaq Inatsisartut ukiaanerani ataatsimiissartik aallartippassuk.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat