Kim Kielsen Inatsisartuni siulittaasutut isornartorsiorneqarnerminut maanna akissuteqartoq
- Naggataatigut apeqqutaalersarpoq tunngaviatigut kina tutsuiginarnerpaanersoq: Umiarsuup naalagaa aqqutissani iluliaqaraluartoq aqqutissaminik aalajangiusimannittoq imaluunniit umiarsuup naalagaa umiarsuarmi ilulissanut apornissaa pinngitsoortinniarlugu aqqutissaminik iluarsiisinnaasoq?
Taama Kim Kielsenip (Attaviitsoq) tusagassiuutinut nalunaarummini, Inatsisartunut siulittaasutut allatamini, naggasiivoq.
Inatsisartut siulittaasuata Inatsisartuni ilaasortat naalakkersuisullu suleqatigiinnissaat qulakkiigassaraa.
Tusagassiuutinulli nalunaarut Siumumit Naleeqaminngaanniillu isorineqarpoq. Taakkua Kim Kielsen naalakkersuisunik illersuinerarpaat illuatungiliuttunullu akerliunerarlugu.
Kim Kielsen tusagassiuutinut siornatigut nalunaarutini allatut isigineqalersinniarlugu, illuatungiliuttunut akissuteqarluni tusagassiuutinut nutaamik maanna nalunaaruteqarpoq.
Isorinninneq paatsoorneqartoq
Erik Jensenip (S) Kim Kielsen illuatungiliuttunik nipangersitsiniarnerarpaa, tamannalu siulittaasup arlaannaannulluunniit attuumassuteqartuunnginnissaanik unioqqutitsinertut isigalugu.
Jens Napatôkip (N) illuatungiliuttut taama eqqaaneqarnerat aamma isumakuluutigaa.
- Ukiorpassuarni Kalaallit Nunaanni politikkikkut suliaqarneq malinnaaffigalugulu peqataaffigisimavara, Inatsisartullu Siulittaasoqarfia naalakkersuisunik siornatigut taama annertutigisumik illersuinera eqqaamanngilara.
Kim Kielsenip tusagassiuutinut nalunaarutini siulleq, inatsisartuni tunngaviusumik suliaqarnermik eqqarsaatiginneqqissaarnertut taavaa - illuatungiliuttunik isornartorsiuinerunngitsoq.
Taanna paarlattuanik isumaqarpoq, naalakkersuisoqatigiit nutaat kikkuugaluarunilluunniit qineqqusaarutiminnut tunngatillugu allatut isumaqaraluarlutik, pissaaninikkaangamik isumaqatiginnikkallartariaqartarsinnaanissaat pillugu nassuiaateqarsimalluni, taamaattumillu illuatungiliuttut isornartorsiuisussatut inissisimasuusut.
- Tusagassiorfinnut nalunaarutinni allaaserivara tamanna qaqugukkulluunniit illuatungiliuttunut periarfissatsialaasoq naalakkersuisuutitaqartunut partiinullu taakkununnga ilaasunut innuttaasut tatiginninnerat sanngiillisinniarsarissallugu. Periarfissaq tamanna tunuarsimaarfigineqarneq ajorpoq, Kim Kielsen allappoq.
- Tamannalu tassa tusagassiorfiit ilaannit partiinik illuatungiliuttunik naveersinertut oqaatiginiarneqarpoq. Naveersinerunngilarli.
Illuatungiliuttut naalakkersuisunik nakkutilliisussatut taanagit isornartorsiuinerat ’politikkikkut toortaanertut’ taavaa.
- Partiinik naalakkersuisuutitaqartunik qineqqusaarnermi neriorsuutiminnik eqquutsitsinnginnerarlugit assuarinnittarneq naalakkersuinikkut toortaaneruvoq nalinginnaasumik atorneqartartoq tamakkiisumillu akuerineqarsinnaasoq, Kim Kielsen allappoq:
- Ullumikkut partiit illuatungiliuttut periaatsimik tamatuminnga atuisut siulliunngillat kingulliussagunaratillu. Naalakkersuinikkut qalliuniarnerup tamanna ilagiinnarpaa.
Naalakkersuisunik illersuineq
Kim Kielsenip naalakkersuisunik Inatsisartuni siulittaasutut illersuisarsimanini ilumoortortaqarnerarpaa.
Naalakkersuisuusarsimasulli tamaasa siornatigut oqaatigisimasamini pinerarpai, massakkut naalakkersuisut kisiisa pinnagit.
- Tamannalumi aamma ilumoortortaqartutut oqaatigineqarsinnaavoq, tassami atugassarititaasut naalakkersuisuutitaqartunut kikkuugaluartunulluunniit, taamalu aamma ullumikkut naalakkersuisuutitaqartunut, atuuttut ilaat tikkuarniarsimavakka.
Inatsisartut siulittaasuata tusagassiuutinut nalunaarutini naggaserlugu, oqallinnerup oqariartuutiginiagaanut tunngatinneqarnani killiligaanani oqaaseqarsinnaanermut tunngatinneqarnera uggoraa.
- Tamannali aamma innuttaasut oqartussaaqataanerat eqqarsaatigalugu oqallinneruvoq pisariaqarsinnaasoq, Kim Kielsen naggasiivoq.
