- Eqqaasariaqassagatsigu maani nunatsinni immitsinnut kisitta eqqarsaatiginata, kisianni aamma nunatsinni sanngiitsortaqaratta tunillatsittariaannarnik, taakkua eqqarsaatigalugit aamma tassa nammineq paarisariaqarpugut aamma allat paarisariaqarpagut, Kim Kielsen oqarpoq.

Kim Kielsen coronavirus pillugu: Sanngiitsortagut eqqarsaatigisigit

- Immitsinnut paarisariaqarpugut aamma allat paarisariaqarpagut. Naalakkersuisut siulittaasuat taama kaammattuuteqarpoq.

Danmarkimi coronavirusimik tunillatsissimasut 27-usut maannamut nalunaarsorneqarput, Savalimmiunilu marluk tuniliatsissimallutik.

Danmarkimi coronavirusimik tunnillatsissimasuni suli toqusoqanngilaq, ataaserlu aaqqereerluni.

Kalaallit Nunaanni ulloq manna tikillugu coronavirusimik tunillatsittoqarsimanngilaq, Naalakkersuisulli qularutiginngilaa innuttaasunik piffissap ilaani tunillatsittoqassasoq.

- Naatsorsuutigineqarpoq aamma takkutissasoq, Kim Kielsen oqarpoq.

AAMMA ATUARUK Savalimmiuni coronavirusimik tunillatsissimasutut paasineqartoq siulleq

Naalakkersuisut siulittaasuata kaammattuutigaa, sanngiinnerusut tunillatsinnissamullu qanittuaraasut eqqarsaatigeqqullugit.

Tunillaassortunik nappaalasoqarneranut ataatsimiititaliarsuup innersuussutai:

- Innuttaasut nunami aarlerinaatilimmeereerlutik nunatsinnut uternerminniit ulluni 14-ini tulliuttuni angerlarsimaannaqqusaapput.

- Innuttaasut nunami aarlerinaatilimmeereerlutik nunatsinnut utersimasut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutinnginnissaat innersuussutaavoq.

Nunat aarlerinaatilittut pineqartut makkuupput:

- Italiami nunap ilai Emilia-Romagna, Lombardiet, Piemonte Venetolu
- Irani tamarmi
- Kina (Hong Kong, Macau Taiwanilu minillugit)
- Korea Kujallermi nunap immikkoortua Gyeongbuk tassanilu illoqarfissuaq Daegu 

Tusarfik: Nunatta tunillaassortunik nappaalasoqarneranut ataatsimiititaliarsua, Danmarkimi peqqissutsimut aqutsisoqarfik

- Eqqaasariaqassagatsigu maani nunatsinni immitsinnut kisitta eqqarsaatiginata, kisianni aamma nunatsinni sanngiitsortaqaratta tunillatsittariaannarnik, taakkua eqqarsaatigalugit aamma tassa immitsinnut paarisariaqarpugut aamma allat paarisariaqarpagut.

Nuummi ilaqutariit marluk Italiap avannaani sulinngiffeqareerlutik nammineq aalajangikkaminnik angerlarsimaffimminniiginnarput. Taakkua arlaannaalluunniit coronavirusimik tunillatsissimanerannik takussutissaqanngillat.

Kangerlussuarmi Nuummilu ininik immikkut inissiivigineqarsinnaasunik tunillatsissimasinnaasunillu misissuiviusartussanik pilersitsisoqareerpoq, Nakorsaaneqarfimmiillu nalunaarutigineqarpoq, ininik immikkut inissiivigineqarsinnaasunik Kulusummi sinerissamilu pilersitsissallutik.

Coronavirusip siaruaakkiartornera naalakkersuisut malinnaafigigaat Kim Kielsenip qulakkeerlugu oqaatiga.

- Nappaalasunut assigiinngitsunut tunngatillugu suliaqartartut piareersimapput, taamaammat massakkumut naalaaginnarpugut, malinnaapput aamma arlaatigut assigiinngitsunik alloriaqqissagutta taava soorunami aamma Naalakkersuisut ilisimatinneqartussaassapput.

AAMMA ATUARUK Ilaqutariit Nuummeersut angerlarsimaannaqquneqartut: Coronaviruseqarnerluta misissorneqarusukkaluarpugut

Tunillaassortunik Nappaalanersuaqarneranut Ataatsimiititaliarsuup pisariaqartinneqartunik iliuuseqartarnera Kim Kielsenip tatigaa.

Ataatsimiititaliarsuullu sulinermi najoqqutarineqartut malikkai taassuma qulakkeerlugu oqaatigaa:

- Piareersimassaagut soorunami, arlaatigut susoqartoqassappat annerusumik, taava ilisimatissavaatigut, taanna tutsuigilluinnaqqissaarpara taakkua suliat ingerlakkaat.

Danskit peqqissutsimut aqutsisoqafiata tallimanngornermi ullup qeqqata siorna kaammattuutigaa, assamittoqartarunnaassasoq, eqitaartoqassanngitsoq kunissuuttoqassanngitsorlu.

Kim Kielsen nunatsinni taamatulli aamma mianersoqqusivoq:

- Tassa sapinngisarput tamaat, suliffeqarfiit ataasiakkaat unittuunnginnissaat, inuiaqatigiittut ingerlanissarput taakkua suliffeqarfiit ingerlaavarnissaat tassani qulakkiigassarivarput, kisianni aamma soorunami tuniluunneq unitsinneqartariaqarpoq, taamaammat inuttut ataasiakkaatut iliuuserisassagut eqqummaariffigisariaqarpagut, Kim Kielsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat