Kim Kielsen Beijingimi Kalaallit Ulluannut qaaqqusisoq

Kalaallit Ulluat Beijingimi ullumi marlunngornermi malunnartinneqassaaq.
Assi © : KNR
oktobarip 31-at 2017 07:50
Nutserisoq Bikki P. Kleist

Naalakkersuisut siulittaasuat Kim Kielsen Kalaallit Nunaat pillugu qallunaat Kinami aallartitaqarfianni naapeqatigiinnissami qaaqqusisuuvoq.

Aallartitat politikerit atorfilittallu 25-t Kinamut tikeraartussanngortut KNR-imi sapaatip akunnerata siuliani oqaluttuaraarput.

Naalakkersuisut siulittaasuat Kim Kielsen Bejingimi aallartitaqarfimmi marlunngornermi ullaap tungaani nalunaaqutaq qulinit tikilluaqqusissaaq aaqqissuussinerlu akunnerni marlunni sivisussuseqassalluni.
Kim Kielsen tikilluaqqusereerpat, Inuussutissarsiornermut Naalakkersuisoqarfimmi pisortaq, Jørn Skov Nielsen nunatsinni aningaasarsiuutaasinnaasut pillugit saqqummiissaaq.

AAMMA ATUARUK Naalakkersuisunut ilaasortat sisamat Kinamut pilerisaariartulersut

Nukissiorfiit pisortaat, Michael Pedersen, nunatsinni minguitsumik nukissiuuteqarsinnaaneq pillugu aamma saqqummiissaaq.

Tamatuma kingorna Kalaallit Airportsimi siulersuisuni siulittaasoq, Jóhannes E. Hansen nunat assigiinngitsut akornanni timmisartuussisalernissamut atatillugu Kinamiut aningaasaliissuteqarsinnaasunut saqqummiussissaaq.

Nunatta rubiiniinik avammut tunisassiorsinnaanera, takornariartitsineq, timmisartukkullu angalanerit umiarsuarmillu takornariarnerit saniatigut saqqummiunneqartussani ilaavoq. Tanny Por, Visit Greenlandimeersoq, Katja Vahlilu Air Greenlandimeersoq saqqummiissapput.

Puisip amia saqqummiinermi aamma ilaatinneqassaaq. Great Greenlandimi pisortap, Ditte Sorknæsip puisip amianik sanaat kusanartuliat takutitsinerlu ullu`qeqqata siorna ilisaritissavai.

Ull`qeqqasiorluartoqassagunarporlu. Imartatta ilaatigut pissarititaanit nunatsinneersunik sassaallertoqassajunnarsivoq, sassaalleeqataasussallu ilaatigut tassaapput Polar Seafood Royal Greenlandilu.

Tamannalu pereerpat, nunatsinnit aallartitat tusagassiortunit apersorneqarsinnaassapput.