Kim Kielsen: Aaqqiinissamut ukioq manna aningaasassanngilagut

Allattoq Mads Lynge
juulip 24-at 2007 14:44

Imaatigut angallannikkut pissutsit aaqqiiviginiarneqartariaqartut Lars-Emil Johansenip, Kuupik Kleistip Per Berthelsenillu oqariartuutigaat, angallannermullu naalakkersuisup, Kim Kielsenip, oqallinneq nuannaralugu oqaatigaa, tusagassiuutitigulli oqallittoqarnissaa orniginartinnagu.

- Aap, aaqqiisoqartariaqarpoq, inatsisartullu ukiaru ataatsimiilerpata aaqqissutaasinnaasunik saqqummiussiumaarpunga, tassa aaqqiissutissanik periarfissanik assigiinngitsunik saqqummiussivigisussaavakka, taamaattorli inatsisartut naapinngitsiarnerini angallannermut ataatsimiititaliaq qanimut isumasioqatigerusuppara, ataatsimoorlutalu aaqqiiviginiarsarissallugu, Kim Kielsen oqarpoq, nangillunilu:

- Naalakkersuisut ukiup sinneranut aaqqiissutissanik tunngatillugu aningaasassaqanngillat, pissaqanngilagut. Taama oqarluaannartariaqarpugut, angallannermut naalakkersuisoq Kim Kielsen oqarpoq.

Umiarsuartigut angallanneq nunatsinni mattutissallugu kukkunerusoq aaqqiivigineqartariaqartorlu, partii Siumup politikkikkut oqaaseqartartuata Lars-Emil Johansenip oqaatigaa. Tamanna pillugu Kim Kielsen ima oqarpoq:

- Kukkunerunersoq kukkunerunnginnersorluunniit oqaatigerusunngilara. Angallasseriaaseq ataaseq aallunneqassasoq taamanikkut toqqarneqarsimavoq, tassaavorlu timmisartuussisalernissaq. Namminersortut ataasiakkaat periarfissinneqarniassammata tamanna siunniunneqarpoq, kisianni tassanngaanniit arlaatigut equsoortoqalaarsimavoq, angallannermut innarliisunik. Taavalu Uummannami Nanortalimmilu aaqqiiniarsimalluta, Kim Kielsen oqarpoq.

Timmisartuinnarnik nunatsinni angallassisoqalernissaq inatsisartut 2005-imi ukiakkut ataatsimiinneranni akuersissutigineqarpoq.