Kim Kielsen 50 million kr-nik neriorsuuteqarsimanngilaq
Kangerlussuarmi nutamik umiarsuliviliortoqarnissamut 50 million kr-nik aningaasaliisoqarnissamik Naalakkersuisut neriorsuuteqanngillat.
Taama qulakkeerinnilluni erseqqissaassuteqarpoq Naalakkersuisut siulittaasuat Kim Kielsen, Qeqqata Kommuniani borgmesterip Hermann Berthelsenip tusagassiuutinut nalunaaruteqarnerata kingorna.
Tusagassiuutinut nalunaarummi sapaatip akunnerani kingullermi Qeqqata kommunianit oqaatigineqarpoq, Naalakkersuisut Kommunilu isumaqatigiissimasut Kangerlussuarmi umiarsuliviornissamut atugassanik aningaasanut inatsimmut aappaagumut 50 million kr-nit immikkoortinneqartut.
Taama nalunaaruteqarneq kommunip nammineerluni akisussaaffigisariarpaa, Naalakkersuisummi erseqqisaatigaat Kangerlussuarmi umiarsualiviup umiarsuarnik takornariartaatinik tulaffigineqarsinnaasup Kalaallit Nunaanni takornariartitsinerup ineriartortinneranut ilapittuutaalluarsinnaammat.
Naalakkersuisut suliniummik ineriartortitaqarput
Naalakkersuisut erseqqissaatigaat Kangerlussuarmi umiarsualivimmut nutaamut suliniummik Naalakkersuisut ineriartortitaqarmata.
Tamannalu aappaagumut aningaasanut inatsit pillugu Inatsisartuni polikikkikkut isumaqatiginninniarnerni suliniutip ilanngussinnaanissaa siunertarineqarluni.
Naalakkersuisut siulittaasuata Kim Kielsenip ilanngullugu nalunaarutigaa ukiup naannginnerani Kangerlussuaq pillugu isumasioqatigiinnermik, Kangerlussuarmut siunissamut takorluugassanik assigiinngitsunik misissuisussamik aaqqissuussinissamik suleqatigiinnissaq Naalakkersuisut aamma Qeqqata kommuniata isumaqatigiissutigimmassuk.