Kim Jong Il: USA apeqqutaavoq
Korea Avannarleq atomip nukinganik sakkussianik misileraaqqissanersoq suli nalunarallarpoq, apeqqutaassaaq USA qanoq iliorniarnersoq, Korea Avannarlermi siuttoq Kim Jong Il oqarpoq.
Japanimi nutaarsiassaqartitsivik Kyodo naapertorlugu, Korea Avannarlermi siuttumut tullersorti Kim Yong-Nam oqarsimavoq atomip nukinganik sakkussianik misileraanerit unitsinneqassappata USA-p politikkia apeqqutaalluinnassasoq, piffissallu takutikkumaaraa nunat arfinillit peqataaffigisaannik isumaqatigiinniarnissanut Korea Avannarleq peqataarusussinnaassasoq.
Korea Avannarlermik niueqateqarnermi USA-mit killilersuinerit atorunnaarsinneqanngippata, atomip nukinganik sakkussianik misileraanerit ingerlaannassasut Korea Avannarlermit oqaatigineqarpoq.
Niueqateqarnermik killilersuinerit sorsukkumanermut sanilliunneqarsinnaasut Korea Avannarlermiunit siornatigut oqaatigineqareerpoq.
- Nunatsinnut sukannersumik iliuutsit sakkortusiartuinnassappata, iliuutsivut aamma sakkortusiartuinnassapput, Korea Avannarlermi atorfilittat ilaat atersineqanngitsoq oqarpoq.