Siumut Kim imaluunniit Vittus
Niviarsiaq, tassa Siumut ilisarnaatitut atugaasa sikkeraruttornerata nalaani Siumut nuna tamakkerlugu ataatsimeersuarpoq. Sikkerarfiillu nalaanni kina siulittaasunngussanersoq pissanganartuusoq politikkikkut malinnaasoq naliliisartorlu isumaqarpoq.
Kim Kielsenimi Vittus Qujaukitsorlu siumumi siulittaasunngorniullutik unammileruttorput.
Tamarmillu assigiinngissuteqaqisut politikkikkut naliliisartup maluginiarsimavaa.
Kim Kielsenip tunuliaqutini tusaaniarneruai. Taakkualu aallaavigalugit avammut saqqummernerusarluni.
- Tassuuna ersiutigivaa naalaaniartuunini Naalakkersuisooqatigiit iluanni aammalu silittumik suleqatigiinnissamik anguniagaqarneq, taanna taamaalilluni nukittoqqutigaa, Sten Lund oqarpoq.
Akerlianillu Vittus Qujaukitsup kisimiilluni nammineq isummani atornerullugit sakkortuumik tupaallannartumillu saqqummertarpoq, assersuutigalugu nunatta kunngeqarfimmik aninissaanik siorasaarivoq, Danmarkilu FN-mut maalaarutigalugu. Tamakkulu tunuliaqutit tusarniarfigeqqaarnagit isummerfigisimavai. Taamaattumik siulittaasunngussappat suleqateqarniarneq qanoq ikkumaarnersoq nalorninartippaa.
- Immineq inuttut isumani anninniartaramigit, aammalu erseqqissaatigisarlugu namminiilivinnissaq sukkasuumik ingernissaa oqariartuutigisarlugu, naliliisartoq oqarpoq.
Siulittaasunngoreniunneq pingaaruteqartoq
Siumut ukiuni arlalinngortuni Naalakkersuisooqataasarpoq, taamaattumillu inuiaqatigiit ineriartornerannut annertuumik sunniuteqartarluni. Taamaattumillu siulittaasunngorniunneq qanoq inerneqarumaarnersoq naliliisartup pissangagivaa.
- Taamaattumik Siumup politikkia maannakkut titartarneqartussanngortoq pissanganarpoq qanoq inuiaqatigiinnut sunniuteqassanersoq. Apeqqutaaginnarporlu tapersersortit qanoq oqimaaloqutaatigissanersut.
Tapersersortit oqimaaloqutaassapput
- Siumukkunni nuimanerit amerliartuinnartumik Kimmimik tapersersuillutik nalunaaruteqaqattaarput. Immaqa tassani imaassimannguatsiarpoq inuiaqatigiit qanoq eqqarsarnersut kissaateqarnersut tusaaniarnerusutut ippaat.
Vittus Qujaukitsumullu tapersersuisut suli saqqummeranngillat.
- Uanili naluara maannakkumut tunngatillugu Lars-Emili eqqaassanngikkaanni allanik tapersersorteqarnersoq maannakkumut nalunaartoqanngilaq.
