Kim Godtfredsen: Umiaq nutaanik inuttaqalerli
Siumup iluani oqallinneq tunngavigalugu, Siumut sinnerlugu qinigassanngortittoq, Kim Godtfredsen, taama ersaritsigisumik nalunaarpoq.
- Oqallinneq massakkut taamaatsillugu, tusagassiuutinit illuatungiliuttunillu inuttassarsiuinermit qilersorneqarsimasutut misigisimavunga, allaat politikkimik namminersornermillu oqallinnissaraluarput pinngitsuulerluni. Kim Godtfredsen oqarpoq:
- Ukiuni kingullerni, ingammillu ukioq kingulleq taasisartorpassuit Inatsisartut kimmaallutik ingerlarusaarnerat tusarnaartarsimavarput. Soorunami ullut ilaanni tujorminartarsimaqaaq. Massakkullu immaqa piffissanngorpoq, umiaq nutaamik iputtulerlugu nutaamillu aquttulerlugu namminersornermut isernissamut ingerlaqqittuuguni. Taamaasilluni peqqinnarnerpaamik ingerlariaqqinnissaa nutaamullu iporiaqqinnissaa pissagaluarmat.
Taamaammat uagut nukissamik nutaamik peqaratta uummammioqarlutalu sassarpugut, innuttaasut periarfissaqarniassammata uagutsinnut qinersinissaminnut, Siumut sinnerlugu qinigassanngortittoq, Nuummeersoq Kim Godtfredsen oqarpoq.
