Kim Godtfredsen: Tuluttut ilinniartitsisussanik amigaateqarpugut

Allamiut oqaasiinik ilinniartitsisinnaasussanik Nuummi meeqqat atuarfiini ilinniartitsisussaaleqisoqarpoq.

Qallunaatoortitsisarnermi, tuluttoortitsisarnermi, tyskisullu ilinniartitsisarnermi ilinniartitsisut ukiuni kingullerni sulerulutsitaaleraluttuinnarsimapput.

Oqaasilerinermik immikkut sammisalimmik ilinniartitsisutut nunatsinni ilinniartitsisutut siorna naammassisoqarsimanngitsoq, Nuummi meeqqanut kultureqarnermullu ataatsimiititaliami siulittaasup tulliata Kim Godtfredsenip, Siumumeersup, oqaatigaa:

- Assersuutigiinnarlugu Ilinniarfissuarmit siorna aasakkut naammassisuni arlaannaataluunniit oqaasilerinermik immikkut linjefag-eqarluni naammassisimanngilaq. Ajornartorsiut tassani aallartereerpoq, taamaammat kommunitsinni tamanna aamma ajornartorsiutigisorujussuuarput, Kim Godtfredsen oqarpoq, nangillunilu:

- Oqaasilerinermik ilinniartitsisuuneq pilerinarsarlugulu soqutiginarsarlugulu kommunitsinni sulissutiginialerparput, ilinniartitsisooreertullu pikkorissartinneqarnerisigut pilerinarnerusunik aammassiffiginiarpagut. Naggataatigullu ilinniartsisunngorniat ima oqaaseqarfigilaarusussinnaavakka:

- Siunissaq eqqarsaatigalugu ilinniartitsisunngorniat sunniuteqaqataaniarunik imminnut piumaffigilaalernerusariaqarput, oqaatsit tungaatigut meeqqat pikkorissut siunissami atorfissaqartilluinnaratsigit. Ilinniartitsisunngorniat akisussaaqataalluinnaramik neriuppunga tamanna tusaassagaat, Kim Godtfredsen oqarpoq.

Nuup illoqarfittaani atuarfiit tallimaapput, nunaqarfittaanilu atuarfiit katillugit marluullutik.