Kim Godtfredsen inersimasunut akuleruttalerpoq

Kalaallit timersullammaat nuimanersaasa ilaat, Kim Godtfredsen nalunaarpoq Sloveniami illoqarfimmi, Ljubljanami timersortartutoqqat, imaluuniit veteraanit, 1000 meteri arpallugu Europami pissartanngorniunneranni peqataaniarluni. Arpanneq aqagu ingerlanneqassaaq, Kim Godtfredsenilu siullerpaamik angutit 40-t 44-llu akornanni ukiullit pissartanngorniuneranni peqataassaaq. Kim Godtfredsen Sloveniamiit oqaluttuarpoq nunanit 50-iniit veteraanit 3.693-it peqataaniartut, namminerlu siulliit pingasut akornanniinnissani siunniussimallugu. Kim Godfredsen aqagu angusaqarluassaguni aappaagu Finlandimi nunarsuatsinni veteraanit pissartanngorniunnissaannut peqataassamaarluni oqarpoq. Kim Godfredsen angusarluarnissaanik kissaapparput, inersimasullu akornannut tikilluaqqullugu.