Killiliineq akerlilerneqarpoq
CITES-i aqqutigalugu nunatsiniit qilalukkat mattaanik, neqaanik tuugavanillu annissisinnaaneq Naalakkersuisunit inerteqqutinngortinneqarallarpoq. Taamatut aalajangerneq Kalaallit Nunaanni Aalisartut Piniartullu Kattuffiannit akerlilerneqartoq siulittaasoq Peter Olsen oqarpoq.
- KNAPK-p tungaaninngaaanniit isumaqatigisinnaanngilluinnarparput, Naalakkersuisut taamatut aalajangersimanerat. Akerliunitsinnut pissutaavoq paaserusukkatsigu kisitsisit suut atorneqarsimanersut, ukiunimi kingullerni arlaqalersuni kisitsisit atorniarneqartartut tutsuinginanngitsutut KNAPK-miit nalilertaratsigu.
KNAPK-p siulittaasua Peter Olsen taama oqarpoq. Pinngortitaleriffimmi pisortaq Klaus Nygaard oqarpoq, ukiorpaalunngulersuni Pinngortitaleriffiup siunnersuutigiuarsimagaluaraa, ikinnerusunik qilalukkanik pisaqartarnissaq, aatsaallu Naalakkersuisut taamatut aalajangernerat Klaus Nygaard-ip kingusigaa.
Ukioq manna pisassiissutit 260-iusut pisaseeqqinnikkut 50-nik ilaneqarput. Taamatullu pisoqarsimanera nunarsuarmioqataasunit ernumatitsisimavoq.
Qilalukkanik kisitsinerit annertuut ilaat qanittumi naammassineqarpoq, aatsaalli aappaagu kisitsisit atorneqarsinnajumaartut Klaus Nygaard oqarpoq.
Kisitsinerup ingerlanera naammaginarluinnartumik ingerlanneqarsimavoq, kisitsisillu NAMMCO-mut appaagu ingerlateqqinneqassapput.
- Qilalukkanik kisitsinermi inernerit takuneqarsinnaalerpata qilalukkallu ilimagisamit amerlaneruppata, imaassinnaavoq qilalukkank pisassat NAMMCO-mit siunnersuutigineqartartut amerlineqarsinnasut, Klaus Nygaard naggasiivoq. Pinngortitaleriffiup kisitsineri kingulliit KNAPK-mit isumalluarfigineqartut KNAPK-p siulittaasua Peter Olsen oqarpoq.
- Soorunami qanittumi kisitsisimaneq KNAPK-miit isumalluarfigeqaarput, ukiuni kingullernut kisitsisarsimanermit qilalukkanik takuffiuneroqisumik kisitsineq ingerlanneqarsimammat. Taamaammat kisitsineq kingulleq utaqqineqaqqaartariaqarsimagaluarpoq.
KNAPK-p siuliuttaasua Peter Olsen, taama oqarpoq.
Peter Olsen aamma isumaqarpoq Naalakkersuisut aningaasanik suli amerlanernik qilalukkanik kisitsinernut aningaasaliisariaqartut.
