Killiligaanani oqaaseqarsinnaaneq isumalioqatigiissitamit nutaamit misissuiffigineqalersoq

Folketingimi amerlanerussuteqarluartut 2016-imi kissaateqarnerat naapertorlugu, danskit naalakkersuisuisa Killiligaanani oqaaseqarsinnaaneq pillugu isumalioqatigiissitamik pilersitsipput.

Danskit inatsisinik atuutsitsinermut ministereqarfiat taama paasissutissiivoq.

Isumalioqatigiissitap suliassaraa killiligaanani oqaaseqarsinnaanerup oqaluttuarisaanermi allanngoriartorsimanera, ullumikkullu qanoq inissisimanera nassuiaateqarfigissallugu, tamatumunngalu peqatigitillugu innuttaasut inuiaqatigiinni oqallinnermi isummernissaminnut kiffaanngissuteqarnissaannut suut pingaaruteqarnersut misissussallugu.

Tamanna nunani allani misilittakkat misissuiffiginerisigut nunaniillu tamalaanit Danmarkimut nussortoqarnerata killiligaanani oqaaseqarsinnaatitaanermut sunniutaanik misissuinikkut ilaatigut pissaaq.

Danskit inatsisinik atuutsitsinermut ministeriat Søren Pape Poulsen isumalioqatigiissitaq pillugu ima oqarpoq:

- Killiligaanani oqaaseqarsinnaatitaaneq tamat oqartussaaqataanerannut inuiaqatigiinnullu tunngavissat pingaarnerpaat ilagivaat. Taamaammat killiligaanani oqallissinnaanermut, inuiaqatigiit toqqammavigisaannut, killiliussat nukittuumik inissisimanissaat qulakkiigassarivarput. Tamannalu qajannaatsumik toqqammavissaqarutta aatsaat pisinnaavoq, Killiligaananilu oqaaseqarsinnaaneq pillugu isumalioqatigiissitap sulineratigut tamanna pissarsiarissavarput.

Killiligaanani oqaaseqarsinnaatitaaneq pillugu isumalioqatigiissitami siulittaasunngortoq tassaavoq Danmarkip aningaaserivissuani pisortaanerusimasoq, Nils Bernstein, ilaasortallu sinneri qulit tassaapput ilisimatusartut, aaqqissuisut oqalliseqataasartullu.

Killiligaanani oqaaseqarsinnaatitaaneq danskit tunngaviusumik inatsisaata ilagaa, taamaattumillu Nunatsinnut Savalimmiunullu aamma atuutsinneqarluni.

Isumalioqatigiissitap angusai aappaagu ukioq naatinnagu tunniunneqareersimassapput.