Kalaallit Nunaanni umiarsuarnik takornariartaatit akuttortipput. Coronamut killilersuutit umiarsuit takornariarteqannginneruneranik pisuutinneqarput.Assi: Mads Pihl

Killilersuutit tamaatitsinerillu sumiiffinni takornariaqarnermut akornutaasut

Coronamut killilersuutit umiarsuarnik takornariartaatinik tikinneqannginnerulernermik, sumiiffinni takornarialerisunut annerusumik tuttarpoq. Kalaallit Nunaata kujataanut umiarsuit takornariartaatit 85 procentii ukioq manna taamaatinneqarput.

Kalaallit Nunaannut umiarsuit takornariartaatit tikittartut akuttupput. Kalaallit Nunaata kujataani 2021-mut pilersaarutaasut tikittussat 76-iusuni 65-t taamaatinneqareerput. Kommune Kujallermi suliniuteqartoq Innovation South Greenland taama ilisimatitsivoq.

Sarah Woodall, Innovation South Greenlandimi ingerlatsisuusoq, sumiiffinni takornarialerusunut sullissisartunut kingunipiloqarnerarpaa:

- Ernumanartorujussuuvoq. Kujataani umiarsuakkut takornariartuinnarnik sullissisortaqarpugut. Ataaseq sullissaqanngilaq, ilaalli ataanassagunik annikilliliisariaqarsimallutik. Ataaseq allanik periarfissarsiorniarluni nunamut allamut nuuppoq, Sarah Woodall oqarpoq.

AAMMA ATUARUK Sisimiunut takornariartaatinik tikittoqannginnera sanaluttartunut annaasaqarfiungaatsiartoq

Nunatsinni takornariaqarfiunerpaasumi Ilulissani takornariakippallaarnerup kingunerluutai aamma malugineqarput. Avannaata Kommuniani takornariaqarnermut siunnersorti, Asbjørn Dissing Bargsteen, oqarpoq:

- Massakkut suna tamarmi taamaatillugu, Ilulissani kommunilluunniit iluani umiarsuarnik takornariartaatinik tulattoqarnavianngilaq. Tammajuitsunik, immakkulluunniit angallassinissaq timmisartukkullu takornariarnissanut isertitassaagaluanut annaasaqangaatsiarpugut. Soorlu umiarsuarnik takornariartaatinik amigaateqarnerput katersugaasivimmut isaatsitanut malunnaateqartut. 

Killilersuutit umiarsuit takornariartaatinut unitsitsisut  

Killilersuutit sukangasuut pissutaallutik, Kalaallit Nunaannut Albatrosimiit umiarsuarnik takornariartitsisinnaanatik Albatrosimi pisortaasoq, Hans Lagerweij, siusinnerusukkut KNR-imut oqarpoq.

Kalaallit Nunaannut ullut 14-t sioqqullugit nunani allani, Danmark Savalimmiullu ilanngullugit, tulaqqasimappata nunatsinnut tulaqqusaanngistut, Kalaallit Nunaannut aallassagaanni Namminersorlutik Oqartussat maleruagassiaanni allaqqavoq.

Peqqinnissamut Naalakkersuisoq, Kirsten Fencker, killilersuutinik allanngortitsinavianngilaq, ullumikkut inissisimaneq taamaaginnaraluarpalluunniit:

- Peqqinnissaqarfitsinnik artukkeeriaanaanissarput mianersuunnerpaffianiippugut. Taamaattumillu killilersuutit makku atuutinneqalerput, taanna oqarpoq.

Killilersuilinnginnermi umiarsuit angissusaat imminullu sillimaniarnerat misissorneqartariartoq, Sarah Woodall isumaqarpoq:

- Ilaasortaatinut ilaalluni Kalaallit Nunaaliassagaanni umiarsuit angissusaat taavalu akiuussuserneqarsimanissamik  niutinnanilu misissortissimanissamik sukannersumik piumasaqaateqarpata iluassagaluarpoq, Sarah Woodall oqarpoq.

Avannaata Kommuniani takornariaqarnermut siunnersortip, Asbjørn Dissing Bargsteen, isumaqatigaa:

- Umiarusit minnerit 200-300-t ilaasoqartartut tulassinnaappata naleqqukkaluarpoq. Umiarsuarmili nappaalasoqalersimappat, Kalaallit Nunaata imartaaniitillugu iliuuseqarfigisariaqalersimassappat akornutaasoq paasilluarsinnaavara.

Timmisartumik ilaallutik Kalaallit Nunaannukartunut killilersuutinut sanilliutissagaanni, umiarsuarnut takornariartaatinut killilersuinerit akimmisaarnarnerupput. Timmisartukkut tikikkaani tamakkiisumillu akiuussuserneqarsimalluni, tikereernermi angerlarsimaanaqqusaaneq atuutinngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat