Killilersuinissamik misissuineq aallartisarpoq
Raajarniarnermi piffissamik killiligaanngitsumik akuersissutinik atorunnaarsitsiniarnermik ilimasaarinermi ajornartorsiutaasinnaasut pillugit, arlaannaannulluunniit attuumassuteqanngitsumik immikkut ilisimasallit sulinerat pillugu Demokraatit sinnerlugit Inatsisartuni ilaasortap Per Skaaning-ip apeqquteqaataa, Naalakkersuisunit ullumi akineqassaaq.
Arlaannaannulluunniit attuumassuteqanngitsumik immikkut ilisimasallit ataatsimiititaliaata sulinera qanga aallartinneqarsimanersoq kiisalu kikkunnik inuttaqarnersoq, Per Skaaning-ip paaserusuppaa.
Ataatsimiititaliap pilersinneqarnissaa siornali isummiunneqarpoq, Ataatsimiititaliallu raajarniartarnermi piffissat killiligaanngitsut killilersorneqalernissaannik misissuinissaq suliassaraa.
Naalakkersuisut akissuteqarnerminni ilisimatitsissutigaat ataatsimiititaliap qaammammi uani sulilernissaa naatsorsuutigineqartoq, ataatsimiititaliamilu lektorit marluk professorillu marluk inuttaasut. Taakkua Danmarkimi ilisimatusarfinni atorfeqartuupput.
Ataatsimiititaliap sulinini aatsaat aallartisarmagu suliap aappaagu maajimi aatsaat naammassineqarnissaa ilimagineqartoq Naalakkersuisut ilisimatitsipput. Tamannalu pillugu raajarniartarnermi piffissat killigaanngitsut killilersorneqalernissaannik siunnersuuteqarneq Naalakkersuisunit taperserneqassanngitsoq ilisimatitsissutigineqarpoq.
