Killilersuinissamik aalajangiisoqanngilaq

Silap pissusaa pillugu Balimi ataatsimeersuarnermi peqataareerluni Avatangiisinut Naalakkersuisoq Ark’alo Abelsen angerlamut apuuteqqammersoq, nunatta avammut nittarsaanneqarsimanera naammaginarnerarpaa, naak nunat suliffissuaqarfiit CO2-mik aniatitsinerminnik killilersuinissaat pillugu aalajangiisoqanngikkaluartoq.
Allattoq Mads Lynge
decembarip 18-at 2007 12:28

- Soorunami taanna uggornaraluarpoq kisianni taamaakkarluartoq oqaloqatigiinnerit ingerlaqqittussaapput. Suliaq 2008-mi nangeqqissaaq, marsimi apriilimilu ataatsimeersuartoqassaaq aappaagu ataatsimeersuarnerit sisamaassallutik, Ark’alo Abelsen nassuiaavoq.

2009-mi sila pillugu anguniagassatut siunniussat anguniarlugit qulaajaasoqarlunilu isumaqatigiinniartoqassaaq.

Balimi nunarput sinnerlugu aallartitaqarneq iluaqutaasoq, Ark’alo Abelsen aamma oqarpoq.

- Soorunami silap pissusaata kissakkiartornera malunnaqisoq ukiuni kingullerni piniartoqarfinnut assorsuaq ajortumik eqquivoq. Neriuppugut nunarsuarmioqatigiit peqatigiilluta mingutsitsinitsinnik millisaanitsigut kigaallatsissinnaagipput, nangippoq.

Eqqaavaa inuit nammineerlutik silap kissakkiartornera aqussinnaanngikkaat, sapinngisamilli silaannarmik CO2-mik aniatitsinerput killilersinnaagipput.

- Neriuutigilluinnarpara Balimi ataatsimeersuarnermi pissarsiarineqartut nunatsinnut kinguneqarluarumaartut, teknologi atorlugu aamma nunarsuarmioqatigiit tamarmik eqqarsarrattorsuummata suliniuteqarlutillu. Neriuppunga taanna aamma nunatsinnut arlaatigut iluaqutaajumaartoq.

Avatangiisinut pisortaqarfimmi sulisut aamma Danmarkimi Avatangiisinut Ministereqarfimmi sulisut peqatigiillutik Naalagaaffiit Peqatigiit sila pillugu ataatsimeersuartitsinissaata tulliata tungaanut nunatsinni silap allanngoriartornerata kinguneri nalunaarsorneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq