Killilersuinikkuunngitsoq sodavandisornikillisinnaavugut

Danmarkimi Folketingimi ilaasortanit siunnersuutigineqarpoq meeqqat 18-it inorlugit ukiullit sodavanditornikinnerulersinniarlugit, meeqqamut ataatsimut sap. ak. sodavandisortagassaq liiterip affaanut pisortatigoortumik killilerneqassasoq, meeqqat pualavallaartut, sukkornermillu nappaatillit amerliartuinnarmata.

Nunatsinni meeqqat 11-it 17-illu akornanni ukiullit pingajorarterutaat ullut tamaasa ataatsimik sodavandisortartut atuartut nerisaqarnerannik 2002-imi misissuisimanermit ilisimaneqarpoq.

Danmarkimi meeqqat sodavandisortarnerannik killilersuiniarnermi massakkut iliuuseriniarneqartoq nunatsinnut naleqqutinngitsoq, Nerisaqarnermut Siunersuisooqatigiit siulittaasuat nakorsaq Gert Mulvad oqarpoq.

-Danmarkimi meeqqat sodavandisornikinnerulernissaannut iliuuseqarniarneq soorunami isumaqatigaarput, kisianni killilersuineq maani aqqutissaasorinngilarput, illutungaanili paasisitsiniaaneq atugassaqqinneruvoq, Gert Mulvad tunngavilersorpoq.

Meeqqat peqqissuussagunik ullormut liiterimik imaluunniit liiterinik marlunnik imertartussaapput.

Tassunga atatillugu atuagaq meeqqat sisamaniik qulinut ukiullit peqqinnartunik inuussuteqartinneqarnissaannik imalik saqqummerseqqammigitsik, tassanilu meeqqat qanoq sunillu imigaqartinnissaat aamma sammineqartoq Gert Mulvad oqarpoq.

- Nunarput meerartatsinnut pitsassuarmik imissaqartitsivoq, pingaartuuvorli meeqqat illigisaminnik imigassaqartinnissaat, imerlu ruujorinit maqiinnarissaneersoq tamatigut illinnarnerpaajusanngilaq. Taamaattumik meeqqat imermik illinnartumik imigassaqalernissaat suliassatsinni tulliuvoq.

Imeq nammineerluni aamma illinnarsarneqarsinnaavoq, soorlu kandi imeq naatitanik aggukkanik citruuninik, paarnanik imaluunniit kuanniminernik ikisiffigisaq imerlugu mamartaqaaq.

Aamma sodavandip puukua imermik qiteqqutiinnarlugu immeriarlugu qerititsivimmi unnuisinneqarsinnaavoq, aqaguanilu imermik ulikkaarluaannarlugu, taamaalilluni meeqqat atuarfimmiinnerminni imigassaat nillarittuaannassaaq,

Gert Mulvad siunnersuivoq.

- Nuuk Imeq immaqa siunnersorneqarsinnaangaluarpoq imermik dunkinut maqitanik tunisassiuinnarani, aammali nunani allanisut, sodavandip puuisut ittunut imermik maqitamik tunisassiorsinnaasoq, Gert Mulvad oqarpoq.

Immiartorfiup sodavandimik ulikkaartup sukkoqassutsimigut naligai sukkut qaqortut arfineq pingasut. Peqqissutsimut Naalakkersuisup Asii Chemnitz Narupip Gert Mulvad taperserlugu oqarpoq Innuttaasut Peqqissuunissaannut Suliniuteqarnissami meeqqat sodavandisorpallaarnerat aamma sammineqarumaartoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat