Killilersuineq piaarpallaqaaq

Qalerallit killilersuiffigalugit kvotilersornissaat naalakkersuisut ippassaq aalajangiiffigaat. Aalisartulli atuutilersitsinissamut piareersaatit amigarnerarpaat.

Finn Karlsen: - Naalakkersuisuni aalajangerpugut marsip aallaqqaataani atuutilernissaanut kinguartinneqassasoq

Aalisarnermut naalakkersuisoq Finn Karlsen oqarpoq 2007-mi pisassiissutit aalajangiunneqartut killilersuiffigineqarpallaaratik atuuteqqaassasut sungiunniaqqaarneqartussaammata killilersuinerit.

Upernavimmi Uummannamilu 5.000 tons-it pisassiissutigineqarput Qeqertarsuup Tunuarmiunut katillugit 12.500 tonsit pisassiissutigineqartut.

Taamatut killilimmik pisassiissuteqartarnikkut qalerallit nungutsaaliorneqarnissaat anguniarneqarpoq.

Pisassiissutit atorneqarnerat sakkortusippat takorloorneqarsinnaavoq siunissami soorlu Uummannarmiut Qeqertarsuup Tunuanut qaleralinniarsinnaajunnaarnissaat, Qeqertarsuullu Tunuamiut aamma Uummannap eqqaanut Upernaviullu eqqaanut qaleralinniarsinnaajunnaarnissaat. Tamannali ukiumi tulliuttumi atuutilernissaa anguniarneqanngitsoq Finn Karlsen oqarpoq.

Qaleralinnik kvotelersuisoqarnissaata ukiortaamiit atuutilernani marsip aallaqqaataaniit aatsaat atuutilersinneqarnissaa Ilulissani KNAPP-ip siulittaasuanut Peter Olsenimut tusarniaatigigatsigu ima oqarpoq:

- Tupaallaatiginngilara uanga tassami siornatigulli noqqaajuaraluarpugut kvotalersuineq takorusullugu inatsisissaa kisianni massakkumut oqaasinnguamik naqinninnguamilluunniit tusarnikuunngilagut taamaammat tupaallaatiginngilluinnarpara kinguartinnera suliluunniit kinguartinnerusariaqarunaraluarpoq tusarniaavigineqaqqaartariaqaratta.

Aalisarnermut piniarnermullu naalakkersuisoq Finn Karlsen oqarpoq Upernavimmi Uummannami Qeqertarsuullu Tunuanni qaleralinniat isumasiorneqarumaartut januaarip ingerlanerani imaluunniit kingusinnerpaamik februaarip aallartinnerani.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat