VIDEO Killeqanngitsumik aalisarsinnaaneq nalilersorneqaqqissaaq

Killilersuiffiunngitsumik sinerissap qanittuani qaleralinniarfissat Naalakkersuisut kissaatiginngisaannik atuutilersinneqarput, ukiullu marluk atuutereersut taamaaliornq isumassarsiatsialaanersoq nalilersueqqinnissaq piffissanngorpoq.

Inatsisartunut taamani ilaasortaasup, Siumumeersup Karl-Kristian Krusep, siunnersuut akerleriissutaasoq siunnersuutigaa. Siunnersuuteqartoq kingornatigut aalisarnermut naalakkersuisunngortinneqarpoq.

Naalakkersuisut politikkikkut mannamut suli ingerlataminnut suli akerliugaluarput, kisianni naalakkersuinikkut ingerlatsineq tassa tamaappoq, ikinnerussuteqartoq oqarpoq.

-  Akerleraarput, Inatsisartulli aalajangigarivaat uagullu piviusunngortittussaavarput.

- Malittarisassat taamaapput, taamaattumik piffissanngortoq oqarpugut. Nalilersueqqitta, qanoq kinguneqarsimanersoq takullugu, Kim Kielsen sisamanngornermi Qulaarpaap qallunaatoortani oqarpoq.

Killilersuiffiunngitsut MSC-mik unitsitsipput

Aalisartut piniartullu kattuffiat KNAPK aaqqissuussamut isornartorsiuinerpaat ilagaat, tikkuarpaalu killilersuiffiunngitsumik qaleralinniarfissiisimanerup nunarput nunat allani tusaamanerlunneqartileraa, qalerallit MSC-mik meqqilersorneqarnissaannut pilersaarummik unitsitsisumik.

- Taamatut ingerlaannarutta MSC-mik meqqilersuinissaq angusinnaanngilarput. Taamaattumik allanngortitsisariaqarpugut, Petrus Biilmann, KNAPK-p pisortaa oqallitsitsinermi oqarpoq.

Aamma atuaruk Killilersugaanngitsumik aalisarneq suli isorineqartoq

Aamma atuaruk NGO: Pisassiissutit naalakkersuinikkut akuliuffigineqassanngillat

Pinngortitaq pillugu nunarsuaq tamakkerlugu suliniaqatigiifiup WWF-p ataqatigiissaarisuata, Kaare Winther Hansenip, politikki ingerlanneqartoq aamma isornartorsiorpaa, taamaalilluni qalerallit nungusaataanngitsumik aalisarneqarnissaannik pisortat aqutsinissaat ajornarsisoq oqarluni.


Pinngortitaq pillugu nunarsuaq tamakkerlugu suliniaqatigiifiup WWF-p ataqatigiissaarisuata, Kaare Winther Hansen.

- Oqaannartoqarsinnaanngilaq ajutuuleraluarpugut, kisianni titarnerup avataani aalisarpugut. Siunissaq eqqarsaatigalugu pisuussutit pingaaruteqaqisut aqussinnaajunnaarnissaat ajussasoq isumaqarpugut, Kaare Winther Hansen oqarpoq. 

Taamaammat Naalakkersuisunut siulittaasup, Kim Kielsenip, aaqqiineq tamanna nalilersoqqinniarmagu nuannaarutigaa.

-  Massakkut aalajangiissanerluta, aalajangiissagaluaruttalu kingunerisinnaasai misissussavavut, Kim Kielsen oqarpoq, erseqqissarlugulu qanittukkut naliliissallutik.

Isummersuutit


 

Pages