Kilitsissiat 13-t parnaarunneqaqquaat
Maanna CIA-p musliminik Europami peqqarniisaarnianik tigusaqarniartarnermini periaasii sammineqaqqilerput. Tysklandimi oqartussat ullumi Amerikamiut CIA-p kilitsissiai 13-it parnaarunneqarnissaannik piumasaqarput. Taakkua Tyskisut naalagaaffimmut innuttaassuseqartumik Afghanistaniliaassisimasutut pasineqarput.
2003-mi ukiutoqqami Makedoniamiut isumannaatsuunissamik suliaqartuisa Khaled al-Masri, Palæstinamiu Tyskisut innuttaassusilik tigusaraat.
Makedoniamiut al-Masri upperisarsiortunut ingasattajaarnianut ilaasortaasoralugu killisiorpaat januaarillu 24-anni Amerikamiut isumannaatsuunissaq pillugu suliaqartuinut CIA-mut tunniuppaat.
Al-Masri oqaluttuarpoq qilersorneqariarluni timmisartumut ikitinneqarsimalluni. Siullermik Irakiliaanneqarpoq kingornatigullu Afghanistaniliaanneqarluni.
Tassani sakkortuumik killisiorneqaqqippoq. Tamatumuuna al-Masrip Tysklandimi illoqarfigisamini muslimit naalaffianni susimanera paaserusunneqarluni. Tassami naalaffik taanna angutit muslimit Tjetjeniamut upperisaq pillugu sorsukkiarusuttut katersuuttarfiattut tusaamaneqarmat.
Ullut ilaanni Makedoniami tigusarineqarnermi kingorna qaammatit tallimat qaangiuttut al-Masri timmisartumik Albanialiaanneqarpoq iperarneqarlunilu.
Tysklandimi naalagaaffiup unnerluussisartuata Amerikamiut 13-it aqqi taallugit tigusaaqqusissummik piumasaqaateqarfigisimavai, tigusamik angallassinermi suliaqarsimasutut pasillugit, ilaat CIA-mi sulisuusut ilaallu CIA-mit akilerneqarsimasut. Taakkua ilagalugit nakorsaq, timmisartortartut sisamat allallu suleqataasimasut. Atit taakkua Spaniamiunit pissarsiarineqarsimapput, tassaanerarneqarlutik Mallorca-mi hotelimi unnuisimasut tassaasullu al-Masri-mik Afghanistaniliaassisimasut.
Pisimasoq Tysklandimi aalassaatigineqaqaaq. Taamalu Tysklandip USA-llu akornanni aaqqiagiinngissutaalerluni. Isumannaatsuunissaq pissutigalugu USA-mit Tyskit unnerluussisut attaveqarfigineqarusunngillat.
