Kilitsissiaq toqunneqarpoq

Russit kilitsissiarisimasaata Aleksander Litvi-nenko-p sananeqaatinik radioaktiviusunik toqunartortortitaasimanini ippassaq toqqutigaa, Tuluit immikkut ilisimasallit taama nalunaarput.

Neriniartarfimmi Litvi-nenkop napparsimalinngitsiarnermini neriffigisaani toqunartup assinga nassaarineqarsimavoq.

Toqunartoq annertoorujussuaq sananeqaatillu radioaktiviusut toqutaasup Litvinenkop quuani nassaarineqarput.

Toqunartoq ima ulorianartigaaq milligrammi ataaseq inuup inersimasup timaani aaqqinneqarsinnaanngitsunik ajoqusiisinnaalluni. Toqunartoq qaqutigoortuuvoq, taamaattorli sikaritsinut suli akuliunneqartarluni taannalu ilaatigut patsisaalluni pujortartartut puammikkut kræfteqalersarput.

Tuluit nunanut allanut ministeeriaqarfiannit Russit nunanut allanut ministeeriaqarfiat saaffigineqareersimavoq, oqaatigineqarluni suliassaq ilungersunartumut sangoriarsimasoq.

Tuluit oqartussaasuinit aammattaaq nalunaarutigineqarpoq, neriniartarfimmi Litvinenkop napparsimalinngitsiarnermini neriffigisaani sananeqaatinik radioaktiviusunik nassaartoqarsimasoq.

Aleksander Litvinenkop Russit præsidentiat Vladimir Putin ammasumik isornartorsiortarpaa.

Litvinenkop toqutinnani Russip aviisiliortup, aamma Putinimik Russillu Tjetjeniami sorsunnerannik isornartorsiuisartup toqutaanera misissuiffigileruttorlugu toqunartortortitaavoq.

Russit præsidentiata Putin-ip ullumi Litvinenkop toqunera alianartutut oqaatigaa.

- Toqusoqaraangat alianartuaannarpoq. Litvinenkop ilaqutaanut misiginneqataanera nalunaarutigaara, Putin oqarpoq.

Taassuma peqatigitillugu Litvinenkop toqunerata Russinut naalakkersuinikkut ajortitsiniutitut atorneqarnissaa mianersoqqussutigaa.

- Pinerluttuliortarneq ajoraluartumik Ruslandimi nunanilu allani atuuppoq. Pinerluttuliortarneq akiorniarlugu suleqatigiinniarta, Russit præsidentiat Helsingfors-imiit taama oqarpoq.