Kalaallit Nunaat Danmarkitulli aamma Savalimmiutut naalagaaffeqatigiinnermut russinit kineserinillu kilitsissianit aarlerinartunut eqqumasariaqarpoq, taama PET-imit nalunaarutigineqarpoq. Asseq: Arktisk Kommando/Air GreenlandAssi: Arktisk Kommando/Air Greenland

Kilitsissianit aarlerinartoq pillugu PET-imi immikkoortortamut pisortaq: Kalaallit Nunaata Rusland aamma Kina eqqumaffigissavai

Nunat Kinatut aamma Ruslanditut ittut annertunerusumik aningaasaliinikkut suleqatiginerini Kalaallit Nunaat kilitsissiaqarnerup tungaatigut sunneruminarnerulissasoq PET-imiit nalunaarusiap nutaap takutippaa. Akerlianilli USA annilaanngatigissanngilarput.

Kalaallit Nunaata, Danmarkip aamma Savalimmiut nunatut Kinatut ittumik annertuumik aningaasaliinissamut suleqateqarnissaq mianersuutigisariaqarpaat. Pingaartumik aningaasaliinerup inuiaqatigiinni immikkoortut pingaaruteqartut Kinap iserfigisinnaassappagit.  

Danmarkimi Politiets Efterretningstjeneste-p (PET) kontraspionage-ani (akisilluni kilitsissiaqarfiani) immikkoortortamut pisortaq, Anders Henriksen siunnersuivoq.

PET sisamanngormat Danmarkimut, Kalaallit Nuaannut aamma Savalimmiunut kilitsissiaqarnikkut aarlerinartoq pillugu nalunaarummik saqqummiivoq

PET ilaatigut allappoq nunat assigiinngitsut akornanni Kinamik aamma Sruslandimik suleqateqarnerup annertuunillu aningaasaliinikkut nunanit taakkunannga marlunnit kilitsissiaqarnikkut Kalaallit Nunaat  akornuserneqariaannaavoq.

AAMMA ATUARUK PET: Ruslandimit aamma Kinamit kilitsissiat Kalallit Nunaannut aarlerisaarutaapput 

Anders Henriksenip erseqqissarpaa Danmarkip, Kalaallit Nunaata aamma Savalimmiut nunat assigiinngitsut akornani nunat sorliit niueqatiginiarneraat PETip isummerfiginngikkaa. Kisianni sillimanissaq pingaaruteqarpoq assersuutigalugu Kinamik niueqatigiinneq ingerlanneqarpat. 

- Nunanit allanit aningaasaliinerit annertuppata aamma immikkoortunut pingaarutilinnut sunniuteqassappata naalagaffimmut allamut atasariaqalernermik kinguneqarsinaanerat eqqummaariffigineqartariaqarpoq, Anders Henriksen oqarpoq nangillunilu:

- Ungasissoq isigalugu immaqa tamanna soqutiginarpallaanngilaq, oqarpoq.

Danskit statsministeriat akuleruppoq 

KNR-ip 2019-imi allaaseraa Danmarkimi statsministeriusimasup, Lars Løkke Rasmussenip kinamiut Nuummi, Ilulissani aamma Qaqortumi mittarfiiliornissamut aningaasaliinermikkut piginneqataalernissaat  unitsikkaa.

Taarsiullugu danskit naalakkersuisui ilanngupput Nuummilu aamma Ilulissani mittarfinnik piginneqataalerlutik.   

Suliap taassuma malitsigisaanik aamma Forsvarets Efterretningstjeneste-p (FE) Kinamik aningaasaliinikkut suleqatigiinnissaq mianersoqqussutigaa.

AAMMA ATUARUK Kinap nunatsinni aningaasaliinissaa illersornissaqarfiup isertortumik paasiniaasartuisa mianersoqqussutigaa 

Aamma PET-imit ullumi tamatorpiaq oqariartuuteqarpoq.

- Kinami inuttut niuernikkut aningaasaliinerit aamma aamma Kinap naalagaaffianiit aningaasaliinerit immikoortikkuminaassinnaapput. Ungasissoq isigalugu eqqumaffigisariaqarpoq taamatut aningaasaliiffigineqarnermi atasariaqalernermik kinguneqarnissaa peqqinnanngissinnaavoq, Anders Henriksen oqarpoq.

Nalunaarusiami PET isumaqarpoq Kina aamma Rusland tassaasut Kalaallit Nunaannut naalagaaffeqatigiinnermullu kilitsissiaqarnikkut aarlerinartuusut.  

Anders Henriksen-ip taavaa Danmark ilaanneeriarlugu nunanut taakkununnga akerliusumik inissisimasartoq.

 - Naalagaaffiit ilaanneeriarluta akerlerisarsimasavut ukkataraavut. Tassaagajuttarput nunat soorlu Ruslanditut, Kinatut aamma Iranitut ittut. Nunat taakku tassaagajupput annertunerujussuarmik soqutigisaqartut Danmarkimut Kalaallillu Nunaannut kilitsissiaqarnissaminnut. Taamaattumik nunat taakku ukkatarineruavut, oqarpoq.

PETip USA tatigaa  

Kisianni Issittumi pissaanilissuaq alla qanittukkut kilitsissiaqarneq pillugu suliamiippoq. Tassa USA.  
Siorna juunimi DR-ip paasisimallugu saqqummiuppaa USAp Danmarkimik suleqateqarnini atorsimagaa ilaatigut Sverigimi, Norgemi aamma Tysklandimi nunat siuttuisa aamma politikeriisa nuimasut isertortumik alapernaarsuiffiginissaannut.

Kisianni Anders Henriksen-ip aalajangiusimavaa PETip USA tatigigaa. Isumaqarpoq USA Kalaallit Nunaannut kilitsissiaqarnikkut aarlerinartorsiortinngikkaa.

- Siullertut sullissivinni Danmarkimilu nalinginnaasumik USAmik qanimut alapernaarsuinikkut suleqateqarpugut, aallavigaarpullu amerikamiut alapersuinikkut sullissiivsa Danmakimi aamma Kalaallit Nunaanni inatsisit ataqqigaat, oqarpqo itisiliillunilu:

- PETip USA-mut suliniuteqarnissaata pisaqannginnera nalilerparput, tassami qanimut USA-mik attaveqaratta aamma USA-mut akerleriissuteqannginnatta.

”Allakkat” kingornatigut internetsikkut akornusiiniartoqarsimanersoq ilisimalluarneqanngilaq 

Ruslandimiit kilitsissiaqarnissaanik aarlerinartoqarnera aamma isigineqassaaq 2019-mi allakkat ilumoortuunngitsut eqqarsaatigalugit.

Allakkat salloqittaataapput akerleriissutaallutillu. Taakkunani ilaatigut allassimavoq Naalakkersuisut Danmarkimit avissaarnissaq pillugu piaarnerpaamik inunnik taasisitsiniartut.

Aamma allassimavoq USAp isertortumik Kalaallit Nunaanni attaveerunnissamik inunnik sukkasuumik taasisitsineq tapersersoraa. T

AAMMA ATUARUK Tusagassiuutit: Naalakkersuisumit Ane Lone Baggerimit allagaritittuusaarneqartoq siammarterneqartoq 

Ifølge PET naapertorlugu ilimanartumik russit allakkanik pilerssitsisuupput naalagaaffeqatigiinnerup iluani imaluunniit USAmut attaveqarnermi avissaartuutititsiniarluni.

Anders Henriksenip oqaatigiumanngilaa internetsikkut akornusersuinernik assersuutitut taaneqartup 2019-imeersup kingornatigut allanik PET ilisimasaqarnersoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl