Kilisaatit koruunit milliardit sisamaarterutaat tunniuppaat
Ataatsimiititaliami siulittaasup, Henrik Lethip Kalaallit Nunaanni Sulisitsisut Peqatigiiffiannilu aalisarneq pillugu siunnersortip, Bent Sørensen-ip neriuutigaat, kisitsisit kingulliit takutissagaat aalisarnerup Nunatsinnut qanoq pingaaruteqartiginera.
Avataasiorlutik aalisartut raajanut nakkutilliinermullu akitsuutitigut 32,2 million koruuninik kiisalu ingerlatseqatigiiffinnit iluanaarutisianillu akileraarutitigut 36,2 million koruuninik Nunatta karsianut akiliisimapput.
Taakku saniatigut aalisariutini inuttat, katillugit 800-it missaanniittut, akissarsiaannit Nunatta karsia 174 million koruuninik akileraarutitigut pissarsisimavoq.
2010-mi Nunatta karsianut nakkartinneqartunut sanilliullugu, 2011-mi Nunatta karsianut aningaasat nakkartinneqartut 17 procentimik amerleriarsimapput.
- Kisitsisit taaneqartut i nuiaqatigiinni atorneqarsinnaapput, inuiaqatigiit aningaasaataannik kaaviiaartitassatut, Nunatsinnilu aalisarnerup qanoq pingaaruteqartigineranut takussutissatut atorneqarsinnaallutik, Sulisitsisut Peqatigiiffianni aalisarneq pillugu siunnersorti, Bent Sørensen taama oqarpoq.
Nunatsinni aalisarnerup ineriartornera siunissami oqimaattorsiortinneqarani ullumikkutut ingerlalluarneq iluatigineqassappat, aalisarnermi sinaakkutaasut, soorlu akileraarutit akitsuutillu, Nunatsinni oqartussaasunit allanngorartinneqannginnissaat, Bent Sørensenip neriuutigaa.
- Aalisartut aningaasaliisarnissaat ingerlanneqaannartussatut isigineqassappat, aalisartunut atugassarititaasut alaakkaasuusariaqarput, Bent Sørensen oqarpoq.
Sulisitsisut Peqatigiiffiata naatsorsuinerminni aamma eqqaavaa, Alcoa-p Nunatta karsianut ukiumut 100 million koruunit isertitsissutaasarnissaanut naleqqiullugu aalisarneq pingasoriaatigajammik Nunatta karsianut ukiumut nakkartitsisarmat. Alcoallu naatsorsueriaasia Sulisitsisunit malinneqarsimasuuppat, Sulisistsisut qularinngilaat inuiaqatigiinnut tunniussinnaasatik 400 million koruunit qaangersimassagaluarlugit.
