Kilisaatip naalagaa sapiitsuliortutut innersuunneqarpoq
Kilisaatip naalagaata Bo Basse Mortensenip kilisaammilu inuttat, 2008-mi decembarimi, Canadap imartaani sikoqaqisumi timmisartortartut marluk imaanut nakkarsimasut, allanit tamanit siulliullutik tikippaat, tassa qulimiguulinnit annaassiniartunit nannunillu siulliullutik tikikkamikkik.
Kilisaat raajarniut, Atlantic Enterprise, Canadap Nunattalu akornanni kilisatsilluni, Canadamiut annaassiniartartuinit radiukkut attavigineqarpoq. Timmisartoq suluusalik mikisoq Cessna-mik taaneqartartoq, Nunatta tungaanut ingerlaartilluni, kilisaammit 180 sømilinik ungasissusilimmiitilluni ajutoorsimavoq. Kilisaallu ajutoorfimmut qaninnerpaasoq oqaatigineqarluni.
Timmisartuaqqap sumiiffimmisut nalunaarutigisaani kingullermi soqanngimmat, kilisaat Atlantic Enterprise, Hudson's Strædep, tassa Akilinermiutoorlugu Nuummiut Imartaata paavata tungaanut ingerlaqqippoq, tamaanimi sikunut annanniarnissaq periarfissaasinnaassammat.
Inuttat ilaata takusaqaqqaarami oqaasii Bo Basse Mortensenip puigunngisaannarpai.
- Samani takusaqarsinnaavunga. Kisianni suunersut naluakka.
Qanillinerugamikkik paasivaat inuusut marluk aappaluttunik qaatiguullit, pisseqattaarlutik aalaterillutillu takoqqusaartut. Timmisartortartut nalunaaquttap akunnerini 16-ini sikumeereerlutik isikkamikkut qerussulaarsimanitik kisiisa ajoqutigaat.
- Pisimasoq tamanna, tamatuma kingornagut takorloortuartarpara. Ilami timmisartortartut ajoqusersimannginnerat upperisassaanngingajapporluunniit. Pisumi tassani kilisaammi inuttat tamarmik qullilisimanissaat ilimagilluinnarpara, Bo Basse Mortensen aviisimut Jyllands-Postenimut oqarpoq.
