Kilisaatini inuttat kattunnissaat ujartorneqarpoq
- Inuttat kattuffeqarnissaat nunatsinni amigaatigineqartoq uani pisumi erserpoq, kilisaatini siornatigut inuttaasimasoq Joel Petersen oqarpoq.
Taanna kattuffimmik siornatigut pilersitsiniarsimagaluarpoq, kattuffiup suliassarisimassagaluarpai inuttat akissarsiaasa pitsanngorsarnissai, sullivimmi avatangiisit pitsaanerulerissaat aammalu inuttat isumannaallisaanikkut soqutigisaat .
Oqarneratummi suliassanik ulikkaarpoq:
- Ajutoornerit annikitsut annertuullu pisarput, ilaatigut tarsiiffigineqarnermik kinguneqarneq allaat ajorlutik.
Aammali inuttat kalaallisuinnaq oqaluttuukkajuttut aqumiullu assersuutigalugu qallunaatut savalimmiutulluunniit oqaluttuukkajuttut akornanni paaseqatigiinniarneq ajornartorsiutaasarpoq:
- Paaseqatigiissinnaaneq annikitsuararsuusarpoq, naak ajutuulernermi sukkasuumik pisut sukkasumik oqaloqatigiissutigeneqartariaqaraluartut, Joel Petersen oqarpoq
SIK-p ataani kilisaatini inuttat soqutigisaqaqatigiiffimmik aallartitsisinnaanissaat, siulittaasup Jess G. Berthelsenip ammaffigaa:
- Kilisatiniittut SIK-p ataani soqutigisaqaqatigiiffeqartariaqarput, imminnut íkiorserniarlutik aammalu isumaqatigiissutinik pitsaanerusumik angusaqarsinnaniarlutik, aammalu isumanaallisaanermut tunngasut ullumikkorniit pitsaanerusumik isumagineqarnissaat anguniarlugit, Jess G. Berthelsen oqarpoq.
SIK-mi kilisaatini inuttanik ilaasortaqarpianngitsoq Jess G. Berthelsen-ip nassuerutigaa.
- Ilaasortaqarpugut, kisianni ajuusaarnaraluartumik amerlanngillat. Qanorlu annertunerusumik iliuuseqassagutta, kilisaatini inuttat amerlanerusut ilaasortarinisssat pingaaruteqarpoq.