Kilisaatini inuttanik IA illersuivoq

Raajarniarnermik nakkutilliinerup annertusineqarnissaa tunuartiinnarneqassappat – taamatullumi pisoqarnissaa ilimanarluinnarpoq – Naalakkersuisut tunngaviusunik isumaqatigiissutaannik tamanna unioqqutitsineruvoq.

Taama isumaqarpoq IA, isumaqatigiissummi pingaarnertut najoqqutassatut allassimasut ilaannut ilaatigut innersuussisoq; ”Pisuussutinik atuinermi piujuaannartitsinissaq avatangiisimillu illersuinissaq tunngavigalugu ingerlatsisoqassaaq”, innersuussummi allassimavoq.

Nalunaarutip oqallisaaqisup anguniagaraa raajartassiissutinik peqquserluttoqartannginnissaa anguniarneqassasoq, aamma raajat ilarpassui ”igitassaannartut” nalilikkat pisassiissutinut ilangunneqartannginnerat, pisanullu ilanngullugit nalunaarsorneqartannginnerat, pinngitsoorniarneqassasoq.

IA naapertorlugu, kilisaatini inuttat aalisartullu akissaasersorneqarnerat nalunaarusiami nutaami illersorneqarnerulerpoq, qulakkeerneqarporlu pisassiissutit raajanut pisarineqartunut naapertuuttut.

Nalunaarusiap sukkasuumik tunuartinneqarnissaa Inatsisartut ippassaq akuersissutigimmassuk IA-p ajuusaarutigaa. Tamanna pivoq, Aalisarnermut ataatsimiititaliami ilaasortat uku, Lars-Emil Johansen aamma Jens-Lars Fleischer, Siumumeersut, Augusta Salling, Atassummeersoq, aamma Jens B. Frederiksen, Demokraatineersoq, siunnersuuteqareersullu. Aalisarnermut ataatsimiititaliap siulittaasua, Ane Hansen, IA-meersoq, nalunaarummut, januaarip ulluisa aallaqqaataanni atuutilersumut, kisimi tapersersuivoq.