Kilisaataatillit EU-mut isumaqatigiissut iluaraat

Namminersorlutik Oqartussat aalisarneq pillugu EU-mik nutaamik isumaqatigiissutaat, ippassigami pisortatigoortumik saqqummiunneqartoq, Sulisitsisut Peqatigiiffiata, GA-p tapersersorpaa.
Allattoq Elisa Isaksen
februaarip 08-at 2012 07:27

Isumaqatigiissut januaarip aallaqqaataanni 2013-imi atuutilerpat, EU-p Nunatta imartaani aalisagartassai ikilisinneqassapput,  tamatumalu peqatigisaanik aalisagartassiissutigineqartut akii qaffanneqassallutik.

Pitsanngoriaatit, isumaqatigiinniarnerit ajornakusoortut ingerlanneqareersullu anguneqartut, nunarsuarmi niuernikkut pissutsit allanngornerinit sunnersimaneqartut malunnarpoq, Sulisitsisut Peqatigiiffiannit avataasiutinik aalisariutaatilinnut aamma kattuffiusumit tusagassiuutinut nalunaarummi oqaatigineqarpoq.

- EU-mut pisassiissutit suli appartinneqarnerunissaat Sulisitsisut Peqatigiiffiannit kissaatiginartinneqarsimagaluarpoq, taamallilluni Kalaallit Nunaanni aalisartut soqutigisaat annerusumik qanillattorneqarsinnaaniassammata.

- Taamaakkaluartoq isumaqatigiissut tamakkiisumik isigigaanni oqimaaqatigiippoq taannalu tapersersorparput, Sulisitsisut Peqatigiiffiannit allapput. erseqqissaatigalugulu, EU-mik suleqateqarnerup pitsaasuunissaa pingaartuusoq, ingammik suleqatigiinnissamut isumaqatigiissutip nutarneqarnissaa sioqqullugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq