Kilisaataatilik: Uulia akikinnerusoq atorneqalersinnaassaaq
-Aalisarnerup iluani imaakkami isertitat aningaasartuutillu nammaqatigiittumik kontrakti malillugu agguaanneqartaramik, taava inuttat aningaasarsiassai aamma tassuunakkut eqqorneqassapput, eqqoriassavaralu immaqa 5-10%-ip missaanik appariaateqassagunartut. Massakkut uuliap akitsornera 50 øre-mik annertuallaanngilaq, kisianni qularnanngitsumik akitsoqqittussaagunarami sunniuteqaleraluttuinnassaaq, Søren Brandt nassuiaavoq.
Uuliap akitsornerata inuussutissarsiornermut kingunipiloqarsinnaanissaa ilimagineqarsinnaanersoq aperineqqutigigatsigu Søren Brandt ima akivoq:
- Aap kinguniloqarsinnaavoq, naak nunatsinni suli annertunerusumik maluginngikkaluarlutigu, kisianni soorlu Norgemi Savalimmiunilu kilisaatit sikulersuisartut ilai uninnikuupput, aallarnermi pisamik isertitaat aningaasartuutinut matussusiisinnaaneq ajormata, tassa kilisaatit arlallit pituttuinnarnikuupput, tamanna aamma nuntsinnut sunniukkumaarpoq, Søren Brandt, oqarpoq.
Uuliap akitsornerata kingunerisai pinaveersimaniarlugit qanoq iliortoqarsinnaanersoq apeqqutigigatsigu oqarpoq namminneq uulia akikinnerusoq atulersimallugu:
- Uagut kilisaatitsinni uulia, eeh, qanoq oqassuunga… oqimaannerusoq imaluunnit diezel-iunngitsoq, taamatut ilaa uulia salinneqarnerani akitsoraluttuinnartarmat taava uagut uulia taamatorsuaq salinneqanngitsoq EFU 30-mik taaguutilimmik uuliamik uagut atuilernikuuvugut. Taanna uulia literimut 1 koruunimik imaluunniit 1 koruuni sinnilaarlugu akikinneruvoq. Motoreput allanngortillugu taanna uulia atulersinnaagatsigu, Søren Brandt nassuiaavoq nangillunilu:
Nalunngilara kilisaatit allat marluk nunatsinni uuliamik akikinnerusumik atuisinnaalerniarlutik piareersartut. Qanittukkut aamma Polar Seafood-ermiut paasiniaavigaatigut qanoq qanorlu iliorsimanitsinnik, aamma taamatut eqqarsarunarlutik.
Uulia taanna nunatsinni pineqarsinnaappat iluaqutaassooq tamatsinnut, kisianni motorit anginerit taamaallaat uulia taanna atorsinnaavaat, tassa kilisaatit anginerit, siunissamilu ilimanarpoq uulia taanna atorusunneqarnerulissasoq qularnanngitsumik, Søren Brandt nassuiaammini taama naggasiivoq.
