Kilisaat aatsaat taama pisaqartigisoq

Avatap raajat 927 tonsit Sisimiuni usingiarpai.
Royal Greenlandip kilisaataataata Avatap aggustip tallimaani raajat 927 tonsit Sisimiuni usingiarpai. Aatsaallu taama oqimaatsigisunik usigiarluni. Assi © : Royal Greenland/Inuuteq Kriegel
aggustip 11-at 2020 09:54

Royal Greenlandip kilisaataataata Avatap aggustip tallimaani raajat 927 tonsit Sisimiuni usingiarpai. Aatsaallu taama oqimaatsigisunik usigiarluni.

Namminersorlutik Oqartussat ingerlatseqatigiiffiat nittartakkamini taama allaaserisaqarpoq.

- Aalisarniarluta avalattarpugut, neriuttarpugullu pisaqarluassalluta. Tamatumuuna avalannerput iluatsilluarpoq, Avatarlu ajutoorneq pissutigalugu aalisarsinnaanikuunngitsoq avalaqqikkami taamak pisaqarluartigimmat nuannaarutigeqaara, kilisaammi Avatami naalagaq, Tordar Dimon oqarpoq.

AAMMA ATUARUK Royal Greenland: Nunatsinni aatsaat taama raajartoqartigaaq

Avataq, kilisaataavoq nutaaliaasoq. Kilisaatit pisoqaanerusut avalannermi ataatsimi nalinginnaasumik 500 tonsit missaanni oqimaassusilinnik pisaqarsinnaasarput, kilisaatilli nutaaliat avalannermi ataatsimi 1000 tonsit pallillugit pisaqarsinnaallutik.

Aatsaat taama oqimaatsigisumik raajanik pisaqarnermi inuttat 25-it sulisorineqartut, Royal Greenland allappoq.

Avataq, nunatsinni kilisaatini nutaanerpaat ilagaat, 2020-mi januaarimi nunatsinnut tikippoq, Unnuk Kultoorisiorfimmilu atertaartinneqarluni.