Kilisaassuaq ikuallappoq
Kilisaassuup ikuallannera unnuap qeqqata missaani nalunaarutigineqarpoq ikuallannerlu siarualertorsimaqaaq. Kissartorujussuanngormat qaartoornerit annikitsut arlallit pisimapput.
- Kilisaatip aquata tungaaniit qatserineq ingerlateriarneqarsimagaluarpoq, kisianni kissartorujussuanngormat aammalu qaartoornerit annikitsut arlallit pimmata nalilerneqarpoq qatseriniarneq ulorianarpallaartoq. Taamaammat qatserisartut qimagutsinneqarput aseruasullu annittuutinniarnissaat kisiat isumagilerlugu, taama politiit najuutsitaann akutsisoq Hallgrim Hansen BT-mut oqarsimanerarneqarpoq.
Maanna ikuallanneq qamikkiartulersoq sulili qaartoortoqallattaasoq Savalimmiormiut aviisiat Dimmalætting ilisimatitsivoq. Oqartussaasut naatsoorsuutigaat illoqarfimmi innuttaasut ullup ingerlanerani angerlamukarsinnaalerumaartut.
Ikuallannermut suna aallarniutaasimanersoq suli paasineqanngilaq.