Kilisaammiut mattunneqarput
Inuttat 16-it umiarsuarmit aamma qimaguteqqusaanngitsut, nunatsinni nakorsaaneqarfik nalunarpoq.
-Inuttat kilisaammit qimaguteqqusaanngillat, inuttat ilaat bakterissamik timip akiuussutissaanik saassussisartumik stafylokokimik taaguuteqartumik tunillaannartoqalersimammat, Nakorsaaneqarfimmi peqqissaasoq, Turid Skifte oqarpoq.
Tunillatsissimasoq assammigut mamikkumanngitsunik ikeqarsimavoq, Nuummilu nakorsiartarfimmut nakorsiarnerani paasineqarpoq Stafylokokkimik tunillatsissimasoq.
- Bakteria taanna inunni peqqissuni naviananngilaq timilli imminnut attuunneranni tunillaattaarluni, peqqissaasoq Turid Skifte oqarpoq.
Stafylokokkip bakteriaa nakorsaatinit bakterissanik toqoraassutaasartunit nakorsarneqarsinaanngilaq, taamaattumillu napparsimagaanni sanngiitsuullunilu, stafylokokkip bakteriaa peqqarniitsumik timi saassussinnaasarpaa katsorsaruminaatsuullunilu.
Eqqiaasartut ISS-imeersut kilisaammi tunillannartuiaallutillu eqqiaapput.
- Stafylokokkip bakteerianik tunillatsittartut nunarsuarmi tamarmi ajornartorsiutaasarput. Nunatsinni stafylokokkip bakteriaanik tunillatsissimasut akuttupput, taamaattumillu sukannersumik iliuuseqarpugut bakterissap tunillaasuutinnginnissaa anguniarlugu, Turid Skifte oqarpoq.
Kilisaammi inuttaq tunillatsissimasoq inuttallu allat kilisaammit qimaguteqqusaanngillat. Inuttat sinneri bakterissamik tunillatsissimanersut misissorneqareerput, mississuinerilli inerneri suli naammassineqanngillat. Tunillatsissimasoq akiuussutissamik qanoq ittumik katsorsarneqassanersoq Danmarkimi naalagaaffiup misissuisitsisarfiani Statens Serumsinstitutimi maannakkut misissorneqarpoq, ullullu arlallit qaanngiuppata paasineqarumaartoq nunatsinni nakorsaaneqarfimmi peqqissaasoq, Turid Skifte oqarpoq.
