Kilisaammiut ikiaroornartumik eqqussisimasut pineqaatissinneqarneri sivitsorneqarput

Nuup eqqartuussivianilu kilisaammiunut tunngasoq suliarineqarmat, inuit arfinillit kiaroornartumik hashimik katillugu 14 kilomik kilisaatip napparuserfianut toqqorsillutik eqqussisimasutut pineqaatissinneqarput.

Ikiaroornartumik eqqusseqataasut pingasut Nuup Eqqartuussivianit pineqaatissinneqarneri, unnerluussisuniit sivikigineqarmata, Nunatta Eqqartuussivianut suliassanngorteqqinneqarput. tassanilu unnerluunneqartut marluk pineqaatissinneqarsimaneri sivitsorneqarput.

Nuup Eqqartuussivianit ukiumik ataatsimik qaammatinilu arfineq pingasuni pineqaatissinneqartoq, Nunatta Eqqartuussivianit pineqaatissinneqarnera ukiunut pingasunut sivitsorneqarpoq.

Aappaa Nuup eqqartuussiviani eqqartuussummik pineqaatissiinngikkallartumik akiligassinneqartoq, Nunatta Eqqartuussivianit pineqaatissinneqangaatsiarpoq, ukiut marluk qaammatillu pingasut pinerlussimasut inissinneqartarfianiittussanngorlugu pineqaatissinneqarami.

Pingajuata Nuup Eqqartuussiaviani pineqaatissinneqarnera Nunatta Eqqartuussivianit naqissuserneqarpoq, taanna ukiut marluk pinerlussimasut inissinneqartarfianiittussanngorlugu pineqaatissinneqarsimammat.

Pineqaatissiinerit politiit ikiaroornartumik misissuisartuisa ittuannit, Finn Jeppesenimit iluarisimaarneqarput.

Allat pingasut ”kilisaammiunut tunngasumi” unnerluunneqartut, ukiuni sisamani, marlunni ukiullu pingajussaat avillugu pinerlussimasut inissinneqartarfianiittussanngorlugit pineqaatissinneqareerput.