Kilisaammi isumannaallisaaneq sakkortuumik uparuarneqarpoq
Angutip kalaallip 37-nik ukiullip aalisariummit Markusimit maajip pingajuani nakkarluni ajunaarnera Imarsiornermut qullersaqarfimmit misissuiffigineqaqqammerpoq.
Ajunaarnerup kingorna killisiuisoqarpoq kilisaallu misissorneqarluni. Misissuinerit tunngavigalugit Imarsiornermut qullersaqarfik arlalinnik uparuaatissaqarpoq.
- Sulineq isumannaatsuusimanngilaq. Allunaasat iluamik inissinneqarsimanngillat, taamaattumillu angut ilagussaajaaniartilluni avammut nassataritippoq.
Sulinermi avatangiisit aamma isumannaallisarneqarsimanngillat. Sipili atorsinnaasimanngilaq, uffa qalut ninginneqartut ajutoorpata, sipili erngerluni utimut aallartussaagaluarluni. Pumpit hydraulikkimik ingerlatillit aallartinniaqqaarlugit aatsaat sipili atorsinnaalersimavoq.
Isumannaallisaanermi atortut aamma ajorsimapput. Inuttat sulinerannut atugassarititaasut misissorneqarsimanngillat, sulinerat qanoq isumannaannerpaamik pisinnaanersoq nalilersorneqarsimanani.
Imarsiornermut Nakkutilliisoqarfiup nalunaarusiaani Kalaallit Nunaanni aalisariutini kilisaatinilu sulinermi atugassarititaasut qanoq innerat paasiniarneqassasoq kajumissaarutigineqarpoq.
Misissuereernermilu isumannaallisaanerit ilisimasallit peqatigalugit isumagisariaqartut inassutigineqarluni.
Imarsiornermut Nakkutilliisoqarfiup ullut 14-it ingerlaneranni nalilissavaa, Ajutoornerni naliliisartoqatigiit inassuteqaataat malillugu kilisaataatilinnut kinguneqartitsisoqassanersoq.
