Kilisaammi inuttaq: Marlunnik suliffeqarsinnaasariaqaraluarpugut
Mads-Pavia Broberg, Qeqertarsuarmi najugaqartoq, avataasiutini aalisartuuvoq, qaammatit marluk avataasiortarluni qaammatinilu marlunni nunami sulinngiffeqartarluni, avataasiutinilu aalasartuunini pissutigalugu inuussutissarsiutigalugu piniarnermut allagartaqarsinnaatitaanngilaq, taamaatumillu umiatsiaararsorluni pisaminik pisortat ingerlataannut tunisisinnaatitaannani. Taamaannalu akuersaarsinnaanngilaa.
Mads-Pavia Broberg isumaqarpoq ullumikkut Kalaallit Nunaanni inuk sulisinnaasoq piginnaasani malillugit killilersorneqarani sulisinnaasariaqartoq.
- Nunarput namminersulernikuuvoq. Nuna taama aningaasameertigisoq innuttaasut pisinnaasut killilersorneqaneri akuersaaarneqarsinnaanngilaq. Islandimutut suliniarta arlariinnik suliffeqarluta. Innuttaasut sulisinnaasut pisinnaasullu suliniarlik. Uagut suligutta aamma nunarput aningaasanik akileraarutitigut nunamut inuiaqatigiinnullu iluaqutaasussanik pissarsissooq, Mads-Pavia Broberg oqarpoq.
Mads-Pavia Broberg isumaqarpoq inatsisiliornikkut inuit piginnaasartik malillugu arlariinnik aningaasarsiorfeqarsinnaanerigaluat killilersorneqartoq.
Ukioq januarimi Mads-Pavia Broberg saniatigut aningaasanik isertitsisinnaanissani siunertaralugu Aalisarnermut Piniarnermullu Naalakkersuisumut, Ane Hansenimut saaffiginnippoq oqaloqatiginnillunilu, paasitinneqarporli inatsisit malillugit, avaasiutini aalisartuunini pissutigalugu, inuussutissarsiutigalugu allagartamik peqarsinnaannginnami, pisaminik pisortat tunitsiviutaannut tuninisisinnaatitaanngitsoq.
- Uanga kisima uannut eqqarsaatiginngilanga. Kalaallit Nunaanni inoqaterpassuaqarpugut sassarsinnaanngitsunik uagutsitulli sulinitta saniatigut sulerusukkaluarlutik killilersorneqartunik. Tamakkulu sinnerlugit aamma uanga saqqummiukkusuppara inuk sulisinnaasoq sulerusuttorlu sulitinneqartariaqartoq. Oqaannartoqarsinnaanngilaq inatsisit taamaammata taamaattoqassasoq, inatsisiliortummi tamanna kisimik allanngortissinnaavaat, Mads-Pavia Broberg oqarpoq.
