Kiliffaap tuloriaa nassaarineqarpoq

Alaskami aavartut itsarsuaq nagguaatsut ilaasa kiliffaap tuloriaanik nassaarsimapput.

Tuloriak 2 meterip missaanik takissuseqarpoq 10 centimeteritut silitsigaluni, Associated Press taama allappoq.

Tuloriaap, aasap ingerlanerani sialuup nuisissimasaata, ilamernga kuup eqqaani nassaarineqarpoq.

Angutit nassaartik angingaarmat akiarlugu nunaqarfimminnukaassimavaat, tuloriallu 75 kilot missaanni oqimaassuseqassangatinneqarpoq.

Tuloriak ilisimatuut maanna pissarsiarerusuttorujussuvaat. Qanoq pisoqaatiginersoq, inunnillu siusinnerusukkut tigummineqareersimanersoq, kulstof 14 atorlugu misissorusuppaat.

Itsarujussuaq uumasuusimasunik ilisimatuup, Yukonimeersup, Paul Matheusip, itsarsuaq kiliffaap tuloriaa immikkuullarissuunerarpaa, ukiullu 30.000-t 100.000-illu akornanni kiliffaat uumagallarneraneersuusinnaasoq, Paul Matheusip ilimagaa.

Tuloriak qanoq pisoqaatiginersoq misissorneqareerpat eqqornerusumik paasissutissiisoqarsinnaasoq ilisimatooq aamma oqarpoq.