Kikkuunersut oqaatigiumanngilai
Demokraatit siulittaasuat Per Berthelsen suli iluamik nassuiaatissaqanngilaq, kalaalinngorsaaneq pillugu oqaaserisimasani paatsoorneqartut qanoq nassuiarneqarsinnaanersut. Inuiannilu ikinnerussuteqartunut illersuissallutik pisussaaffigalugu aamma oqarpoq.
Kalaalinngorsaaneq pillugu inatsisartuni oqallissaarisut saqqummiussaat, inuiannut allanut akeqqersimaartutut suli isigalugit Per Berthelsen oqarpoq.
Per Berthelsen Inatsisartut oqaluttarfianniit oktobarip 15-anni ima oqaaseqarpoq:
"Taamaammallu oqallissaarisut saqqummiussaasa iluini oqariartuutit ilaat amiilaajallaatiginngitsunngilakka, oqaluttuarisaanermi pisarsimasunut inuiaat imminnut sutoruujussuaq isigalutik ataatsimoorlutik inuiannut aaliangersimasunut allanut akeqqersimaarnerannut eqqaanartunik annertuunik imaqarmata."
- Paatsoorumasunut aporfissaqannglaq, Per Berthelsenoqarpoq.
-Nunaqqatitsitut taasartakkavut sakkortoorujussuarmik uparuartorneqarput assiginngitsutigut mamianarsinnaasunik imaqartunik. Taamaattumik eqqartorneqartut akeriarsinnaanngitsut illersorniarlugit taama oqarpunga, Per Berthelsen oqarpoq.
Per Berthelsen isumaqarpoq oqariartuutini paatsoorneqarsinnaanngitsoq, imaammat:
- Inuiaat akeqqersimaartumik tunngaveqartumik katersorniarneqartut aallaaviugaangata nunarsuarmi oqaluttuarisaanermi tamatigorluinnaq alianartuinnavinnik kinguneqartarmata, taamaattumik Demokraaatit oqallinnerup allamut sangutinnissaa kissaatigigaat.
