Kikkut tatigineqarsinnaanersut Irakimi immaqa eqqarsaatersuutigineqarpoq

Irakimi inatsisartut pisarnertik malillugu ullumikkut tallimanngornermi ataatsimiipput.

Tassa ataatsimiipput, naak imminut toqoriaatigaluni ippassaq qaartartumeerisoqarneratigut toqunniarneqaraluarlutik.

Imminut toqoriaatigaluni ippassaq qaartartumeerinikkut inatsisartuni ilaasortat pingasut toqutaapput, taama pisoqarpoq Bagdadip ilaani “isumannaallisagarujussuup” iluani.

Paarsisut tatigineqarsinnaanngippata, taava kikkut tatigineqarsinnaassappat? Irakimi inatsisartut 272-iusut taama eqqarsarsimassagunarput.

Imminut toqoriaatigaluni ippassaq qaartartumeerisoq, arfineq pingasunik toqutsisoq 20-nillu ikiliisoq, ilimagineqarpoq, tassaasimassasoq paarsisut ilaat, imaluunniit atorfilittat ilaat, imaluunniit paarsisunit atorfilittanilluunniit ikiorneqarluni qaartartumeerisoq.

Tassami qaartartumeerisup Inatsisartut ataatsimiittarfianukartinnani isumannaallisaanerit arfineq pingasut paasineqarnani qanoq ililluni aqqusaarsimasinnaanerai eqqumiigineqarpoq.

Isumannaallisaatit ilaatigut tassaapput irakimiut sakkutuui sakkulersorsimasut paarsisuutinneqartut, saviminernik ujarliutit, ungerutissiat kapinartullit, assiliissutit, qarmarsuit, aqqusinernilu nakkutilliisut nunanit tamalaaneersut.

Bagdadimi illoqarfiup ilaa tamanna “isumannaallisagarujussuaq” 7 kvadratkilometerinik annertussuseqartoq kikkunnit tamanit iserfigineqarsinnaanngilaq. Tamanna Saddamip illersortaasalu siusinnerusukkut pallittaalisaqarfigaat. Illoqarfiup ilaani, maanna nuannarineqanngeqisumi, tamaaniipput ministereqarfiit, nunat allat aallartitaqarfii, nunanilu allamiorpassuit sorsuffiup avataani illersugaallutik inissisimasut.

Ippassaq ajortoqariataarpoq, immaqa maligaasat atorlugit misissuissutit ilaat ajoquteqarsimanerpoq imaluunniit nakkutilliisut qimmillit kukkusimanerput. Imaluunniit qaartartut inatsisartut ataatsimiittarfianeereersimanersut apeqquserneqarput. Atorfilittat pingasut ullumikkut tigusarineqarput, imaassinnaavoq taakku qaartartumeerisumut ikiuussimasut. Tassami peqqarniisaarniat sioorasaarillutik ikiortissarsisinnaasarnerat ilisimaneqareerpoq.

Peqqarniisaarniat al-Qaedameersut Inatsisartut ataatsimiittarfianni ippassaq qaartartumeerinermut akisussaasuullutik ullaap tungaa nalunaarutigaat.