Danmarkimi folketingimut qinersisoqalerneranik tusatsiakkat imaaginnavipput. Qinersineq nunatsinnut aamma sunniuteqassaaq, Folketingimummi ilaasortassanik marlunnik qinersisussaavugut. Kikkummitaava qinigassanngortinniarpat?
Qinersineq qanittukkut kingusinnerusukkulluunniit pigaluarpat nunatta Folketingimut ilaasortaatitai allanngortussaassapput. Tassami maanna ilaasortaasut aappaat, IA-meersoq Kuupik Kleist, partiimi siulittaasunngornermi kingornagut qinigassanngorteqqinniarnani nalunaareerpoq.
Nunatta ilaasortaatitaata aappaa Lars-Emil Johansen Siumumeersoq, ullumi nalunaarpoq Folketingimut qinersisoqalerpat qinigassanngorteqqinniarluni.
Kuupik Kleist taarserlugu IA-p kina pingaarnertut qinigassanngortissaneraa suli aalajangerneqanngilaq. Kikkut qinigassanngortissanersut partiip siulersuisuunerisa aalajangertarpaat.
- Ulluinnarni aqutsisuni ullumikkut tamanna oqaluuserissavarput, kisianni qinigassanngortitassavut kikkuussanersut suli avammut nalunaarutigisinnaanngilarput, partiip siulittaasua oqarpoq.
Demokraatit Folketingimut sisamanik qinigassanngortitsiniarput.
- Sisamaasunit taakkunannga pingasut piareersimapput, kisiannili massakkut kikkuuneri oqaatigisinnaanngilakka. Qanittukkut qinigassanngortitatta kikkuuneri nalunaarutigiumaarparput, Palle Christiansen siulersuisuunernut ilaasortaasoq oqarpoq.
Kattusseqatigiit Partiiata Folketingimut qinigassanngortitsissanerlutik suli aalajangiiffiginngikkaat borgmesteri aamma Inatsisartunut ilaasortaq, Anthon Frederiksen ilisimatitsivoq.
Partiit Inatsisartunut ilaasortaatitaqartut Folketingimut qinersinermut qinigassanngortitsisinnaapput. Aammattaaq partiit avataasigut kisimiilluni qinigassanngortinnissamut periarfissaqarpoq. Taamatulli qinigassanngortinniartut ikinnerpaamik atsiornernik 100-nik katersisimanissaat piumasaqaataavoq.
Naalagaaffiup nunatsinni sinniisuutitaata nunatsinni Folketingimut qinersineq ataqatigiissartussaavaa. Aamma eqqaasinnaavarput naak qinersisoqarnissaanik tusatsiakkat imaaginnaraluartut ministeriunerup Anders Fogh Rasmussenip qaqugu qinersisoqarnissaa suli aalajangiutinngimmagu.
